West Brom striker hlui Berahino a chawl
West Bromwich Albion striker hlui Saido Berahino chuan kum 33 mi chauh niin inkhelh a chawlhsan thu a puang a, Burundi national team chu coach angin a kaihruai chhunzawm dawn.
Mangṭha Berahino
Kum 33 mi Berahino chuan, "Football hian engkim min pe a, raltlan naupangin ka suangtuah phâk ngai loh Premier League hial ka khelh theih phah. Naupang mai ka nih laia min ringtu West Brom chungah lawmthu ka sawi a, fans, coach leh ka khelhpui te zawng zawng chungah ka lawm bawk
Tunah chuan ka boot khai a hun ve ta a, Burundi tan coach ka ni thei tur hi ka tan chawimawina a ni a, keimah min siam liantu ram tana thawh hi thil dik tak a ni. Hei hi football-a ka tawpna tur a ni lo a, bung khat tawpna chauh niin a dang inṭan lehna tur a ni zawk," tiin Instagram-ah a post.
A zinkawng
Berahino hi Burundi-ah piangin 1997-a civil war-a a pa a thih hnuah England-ah an insawn a, kum 2004 khan West Brom under-12 team zawmin kum sarih hnuah 2011 khan a career-a professional contract hmasa ber a ziak.
Kum 2013-14 season khan khatihlaia West Brom manager Steve Clarke-a'n Berahino chu rinrawlah hman a duh a, Hawthorns tan bul a ṭan hmasak berah hattrick a siam nghal. Hemi hnu lawk hian Old Trafford-ah 2-1 a Manchester United an hneh ṭumin chakna goal a khung a, rawlthar hot ber pawl a ni zui.
Kum 2014-15 season khan Hawthorns tan Premier League-ah goal 14 khungin ani aia khung hnem panga chiah an awm a, inelna hrang hrangah goal 20 a khung bawk.
Mahse
A chet ṭhat avangin Berahino hi Tottenham Hotspur-in lak luh an duh a, mahse a manah an inrem theih loh avangin a chhuak ta lo. Salomon Rondon-a'n a luahlan avangin Berahino a hlim lo a, tlakhniam lam a pan chhunzawm.
Season hnih châm chhunzawm mah se goal sarih chiah a khung a, kum 2016 khan Stoke City-ah a career siam ṭhat tumin a lut a, season thum chhungin goal nga bak a khung thei lo.
Hemi hnu hian Zulte Waregem, Charleroi, Sheffield Wednesday, AEL Limassol leh Rajasthan United-ah te khel kual mah se ngai a awh leh tawh lo a, nikum khan Slovenian club Tabor Sezana zawmin a club hnuhnung ber a ni zui.