Verstappen ṭha zawk kan hmu dawn - Wolff

Mercedes team principal Toto Wolff chuan season tharah Red Bull chu ropui taka an kir tur thu a sawi a, Max Verstappen chu tun aia ṭhain a tlan leh tur thu a sawi bawk.

Kum 54 mi Wolff chuan, "Tun season-a Red Bull thil tih tawhte avang hian zahna lantir an phuin ka hria. Car thar ṭha tak siam chhuah a ni a, a tirah che ṭha nghal lo mah ila kan driver te an insiam rem tawh.

Verstappen hi Bahrain leh Singapore Grand Prix-ah tuman an tluk phâk lo a, season tir lamah che ṭha tawk lo mah se a thiamna leh theihna a lantir leh ṭan tawh. Kum tharah chuan amaha ṭha ber a lan chhuah ngei ka ring," a ti.

Kuminah F1-in dan thar an siamah driver tam tak an lungawi lo a, an zingah Verstappen a ṭawng hnem avangin a langsar hle. Dutch driver hi a chet ṭhat tawk loh avangin F1 chawlhsan a rilruk hman hial.

Mahse kum 28 mi driver hi muangchangin a insiamṭha a, podium vawi kua lawnin vawi hnih a chak tawh a, Red Bull-ah kum 2030 thleng châm turin contract a ziak thar bawk.

Chutihrualin kuminah Mercedes driver Andrea Kimi Antonelli a che ṭha a, Italian driver hian USA GP-ah a chak a nih chuan point 25 a hmu thei dawn a, amah hnaih bertu Russell-a'n point hnih ai tam a hmuh loh bakah, Ferrari driver Lewis Hamilton-a'n point 10 ai tam a hmuh loh chuan intlansiak paruk la awmah a champion thei dawn.

Kum 20 mi Antonelli hi a champion a nih chuan 1953 hnua Italian driver champion leh hmasa ber a ni thei dawn a, Italian zinga champion thei pathumna a ni chiah ang.

Chutihrualin tun hnaiah Verstappen a chet ṭhat thar avangin Antonelli tan hnehna chan a awlsam tawh dawn lo a, hei bakah hian Charles Leclerc leh champion lai Lando Norris te an la awm bawk a, Antonelli tan a awlsam dawn lo.