Frimpong a chawl rih dawn

Liverpool boss Andoni Iraola chuan right back Jeremie Frimpong chu hun engemaw chen a chawlh rih a ngaih thu a sawi a, Dutch defender hian match ruk vel tal chu khel loa hun a hman a ngai dawn.

Frimpong hi Liverpool-in 2-1 a Brentford an hnehna inkhelah khan a inhliam a, bench aṭanga luhtir ni mah se, khelmualah hun pawh hmang rei hman loin lakchhuah leh a ni zui.

Iraola chuan, "Jeremie hian a tihrawlah hliam a nei a, khelmualah minute hnih emaw minute thum emaw vel a awm tih khan a inhliam nghal. International break zawh hma chuan kan chhawr thei rih ka ring lo," a ti.

November 9 - 17 inkar hian international break hman leh tur a ni a, hetih chhung hian Liverpool hian EPL, League Cup leh Champions League-ah te match ruk an khel dawn - nizan khan Villarreal nen inkhelin, an result kan hre hman lo.

Frimpong hian hliam vangin match rukte hi a khel thei lo vek dawn tihna a ni a, hetih chhung hian Chelsea leh Arsenal an hmachhawn tel dawn bawk - squad chhah mamawh vanglai taka Dutch full back inhliam hi Liverpool tan a pawi khawp ang.

Hetihlai hian international break aṭanga hliam nei chunga lo kir, Brentford laka bul ṭan, rei lo têa lakchhuah ngai Dominik Szoboszlai dinhmun chu a ngaihtuahawm loh thu a sawi tel a, Liverpool ṭantute tan thawm rimawi a tling.

Iraola chuan, "Dominik a ngaihtuahawm lo a, lakchhuah a nih chhan chu a hmaa hliam a neihna tho kha a ni a, a inhliam belh lo bawk," a ti a, Hungarian midfielder chu a dam ṭhat leh vat tur thu a sawi.