Carvajal-a'n Getafe chakpui zo lo

Spanish defender Dani Carvajal chuan Thawhṭanni zan khan a club thar Getafe tan a match hmasa ber a khel a, mahse an mikhual Rayo Vallecano lakah hnehna a chanpui zo lo.

Estadio Coliseum-a inkhelah Rayo tan Alvaro Garcia Rivera-a'n minute 11-na lekah an hmahruaina goal a khung a, mual neitu tan defender Djene Dakonam-a'n minute 28-naah red card a hmu a, Getafe an buai phah hle.

Martin Satriano-a'n minute 56-naah an siphurh a sut a, goal dang khung thei lo mah se Carvajal hoa goal an chhuah bik loh avangin an mualah Getafe an him thei hram.

Kum 34 mi Carvajal hi season hmasa tawp rual khan Santiago Bernabeu-a a contract a tawp ve nghal a, Real-in contract thar an zawrh loh avangin free transfer-in Getafe a zawm a, kum khat châm turin inremna an siam.

Getafe tana a inlan hmasak berah an team-in hma takah red card an chawi avangin an khelh fimkhur a ngai a, mahse mimal takin Carvajal a khel chhe lo a, tun season-ah Getafe-in rinrawla an hmang a nih pawhin a mak lo ang.