November-ah IWL khel ṭan dawn

India rama hmeichhe football league sang ber, Indian Women’s League (IWL) chu November 13-ah khelh ṭan a ni dawn a, club pariatin inelna an hmachhawn dawn - Kolkata, Jamshedpur leh Bengaluru-ah te inelna hi neih a ni ang.

Club pariatin IWL hi an hmachhawn dawn a, season hmasaa inlan club paruk East Bengal FC, Sethu FC, Kickstart FC, Nita Football Academy, Gokulam Kerala FC leh BBFS Garhwal United FC te chu tun season-ah pawh an inlan dawn a, anni bakah hian IWL 2-a pakhatna HOPS FC leh pahnihna Juba Sangha FC an inlan dawn bawk.

Ruahman dan chuan league hi round-robin format-a khelh tur a ni a, club-te hi vawi hnih ṭheuh an inkhel kual dawn tihna a ni - match 56 khelh a ni ang a, January 23, 2027-ah league hi khelh zawh hman tura ruahmanna siam a ni.

IWL-ah hian East Bengal hmeichhe team chu champion lai niin, season hman zawh takah khan match 14 khelhah vawi 13 hnehna changin, vawi khat chiah an tlawm a, pahnihna Sethu aiin point 14 ngawtin an hmu sang zawk.