Real Madrid hmachhawn tur Leipzig

Jose Mourinho enkawl Real Madrid chuan zanin dar 12:30 hian Champions League-ah German club RB Leipzig chu Santiago Bernabeu-ah an mikhual dawn.

Real hian an club dinthar leh duhin Mourinho meuh la lut mah se an buaina a chinfelin a awm nghal bik lo a, Real Betis leh Atletico Madrid an hneh loh avangin La Liga-ah pathumnaah an awm mek.

Champions League-ah match hnih khel tawhin Inter Milan 2-1 in an hneh a, October 15, Nilaini zan khan AS Roma chu khualmualah 4-3 in an hneh hram. Real hian goal thun lamah harsatna tawk lo mah se tlarhnungah buaina an tawk a, mahse Eder Militao a lo kir leh tawh avangin an buaina a su kiang thei ang.

An match hnuhnung berah Sevilla chu 4-1 in an hneh a, Kylian Mbappe-a'n goal hnih a khung avangin a inrintawk lai tak a ni a, Leipzig tan hmachhawn a châkawm loh lai tak a ni.

Hei bakah hian an player thar Yan Diomande a che ṭha a, La Liga-ah red card a hmuh avanga an hrem Vinicius Junior chu UCL-ah a chhawr theih dawn a, Sevilla laka goal ropui khungtu Arda Guler-a'n bul a ṭan a beiseiawm bawk.

Midfield-ah Mourinho-a'n duhthlan tur a ngah a, Jude Bellingham, Aurelien Tchouameni, Eduardo Camavinga leh Bernardo Silva te bakah Brahim Diaz a la awm cheu a, Federico Valverde erawh right back-ah chhawr leh a nih a rinawm zawk.

Los Blancos hian October 25, Pathianni zanah El Clasico an khel zui dawn a, an hmelma Barcelona-in hneh loh la tawng loa season duhawm tak an hman lai tihtawpsak an duh dawn. Chuvangin Mourinho-a'n player ṭhenkhat hahdamna hun a pe a nih pawhin a mak lo ang.

Chutihrualin Leipzig-in Christopher Nkunku an nei a, French forward hian tun season-ah goal li khung tawhin assist pahnih a nei tawh a, amah thlawp turin Antonio Nusa a la awmn bawk avangin Real an fimkhur tel a ngai dawn.