Wolves-ah McDaniels kum khat dang

Minnesota Timber-wolves chuan an player Jaden McDaniels chu an hnena kum khat dang châm turin contract an ziahpui a, an inremna tharah hian McDaniels hian dollar maktaduai 40 a hlawh dawn.

Kum 26 mi McDaniels hian Wolves-ah kum hnih daih contract a la nei a, mahse club hotute chuan champion an beisei ngam avangin an player pawimawh chelh turin sum an thehchhuak hreh lo. McDaniels hi 2029-30 season tawp thleng Wolves-ah a châm dawn.

McDaniels hi kum 2020 NBA draft-ah khan Los Angeles Lakers chuan an thlang a, mahse Lakers hian Dennis Schroder an lak theih nan Oklahoma City Thunder-ah an kaltir leh nghal. Thunder tan pawh match khat a khelh hmain chhuahtir a ni leh a, Wolves hi zawmin club dang tan a la khel lo.

Wolves tan McDaniels hi player pawimawh a ni a, season hmasa khan match 73 a khelin match tinah point 14.8 leh rebound 4.2 nei ziah ang a ni a, American forward hi defence lamah player ṭangkai tak a ni.

Kuminah nipuiah Wolves hian Lamelo Ball, Jonathan Kuminga, Ayo Dosunmu, Trey Lyles leh Bones Hyland te an la lut tawh a, NBA player ṭha ber zinga mi Anthony Edwards an kawl bakah Donte DiVincenzo, Rudy Gobert leh Cody Williams te an neih sa avangin champion an tum ngam ang.