Chong Wei-a'n training a ṭan

Badminton world number 1 hlui Lee Chong Wei chuan hnar cancer vanga hun rei tak a chawlh hnuah nimin khan Academy Badminton Malaysia (ABM), Bukit Kiara-ah training a zawm.

Chong Wei hian darkar khat chhung traning hi a nei a, men’s singles coach pahnih Datuk Misbun Sidek leh Hendrawan bakah women’s singles head coach Datuk Tey Seu Bock ten uluk takin training hi a thlir a, National Sports Institute (NSI) physiotherapist-in a awm chilh bawk.

Malaysian Shuttler-in inelna a hmachhawn hnuhnun ber chu nikum July thla kha niin Indonesian Open semifinal-ah world champion Kento Momota a hneh lo. He inelna neih zawh khar khat hnuah Chong Wei hian cancer a vei tih an hre chhuak a, Taiwan-ah thla hnih leh a chanve chhung a inenkawl.

Chong Wei chuan, "Cancer natna a darh hman lo a, ka ṭha e. Doctor-in training min phal sak tawh a, amaherawhchu hun rei tak ka la thei lo. Tun hmaa ka theih 

ṭhin 30% chauh ka la ti thei a, ka dinhmun hrechiang turin Taiwan-ah doctor ka pan leh ang," tiin a sawi.

A bul ṭan tum leh dan sawiin Chong Wei chuan, "Vawi 12 ka champion tawhna Malaysia Open-ah bul ṭan leh ka duh a, damlohnain min tlak buak hmain he inelnaah hian nomawi ka chawi a, chuvangin heta ṭanga ṭan hi ka duh," a ti a, Malaysia Open hi April 2-7 inkara khelh ṭan tur a ni.