Liverpool-in Villarreal an hneh hram

Champions League match thum an khelh tawhah Liverpool an la chak vek - Reds hian Thawhlehni zan khan an mikhual Villarreal chu 4-3 in an hneh a, Atletico Madrid (2-1) leh LASK (6-3) an lo hneh tawh bawk avangin Reds dinhmun a ṭha ta hle.

Liverpool tan hian Alexis Mac Allister chuan goal hnih khungin, Ronald Araújo leh Florian Wirtz ten goal khat ve ve an khung bawk a, Spanish club tana Georges Mikautadze, Sergi Cardona leh Tani Oluwaseyi te goal khung chu scoreline cheimawina bak a tling ta lo.

Merseyside club-in hnehna an chan avangin an hlim a, chutihrual chuan UCL match thum lekah goal sarih an chhuah tawh avangin tlarhnung lamin insiamṭhat an mamawh tih erawh a lang chiang - Reds tan hmabak a la tam e!

A zuam sual!

Liverpool boss Andoni Iraola-a'n match khelh tur an ngah thu sawiin, fixture tawtzia kar hmasa lawk khan a sawi a, chhuanlam atana hman erawh a tum lo. "Champions League khelhin a ken tel a ni," a ti a, anmahni zawk an insiamrem a ngaih thu a sawi.

Spanish coach hian hei hi hre rengin, player a siksawi fo a, Villarreal lakah pawh, Brentford laka 2-1 a chak Liverpool starting XI aṭangin player paruk ngawt a thlak danglam. Bench-a awm zingah Alexander Isak, Bradley Barcola leh Wirtz an tel a, Spanish club a zuam deuh niin a lang.

Mahse, Iraola-a'n mikhual team a zuam sual a, Liverpool hian minute lina lekah goal an chhuah nghal - Virgil van Dijk-a ball tauh let chu Mikautadze-a'n nangchingin, kum 25 mi Georgian forward hian goal-ah a chantir.

A harsa

Liverpool-in hma takah goal an chhuah a, mahni home-a inkhel an nih avang erawh chuan fans thla a muang. Mahse, minute 29-na a ni a, Anfield-ah mualneitu Liverpool bawkin goal an chhuah nawn leh ta!

Nathan Saliba chuan Liverpool tlarhnung pherh tak karah ball thawlh lutin, Sergi Cardona tan Alisson-a si ban vena chhuih luh mai loh chu tih tur dang a awm lo. Villarreal bawkin goal an khung a, minute 30 pawh a tlin hmain 2-0 a ni ta der.

Liverpool tan hmabak a harsa ta thut a, awm mai mai thei an ni tawh lo! Minute 36-naah Alexis Mac Allister a inlar a, Kostas Tsimikas-a corner pet aṭanga ball kal chu tauh lutin, 2-1 a ni a, Reds an phur sawt.

Rawlthar duhawm

First half hun pek belh a ni a, Liverpool bawk kan hmu nawn - Rio Ngumoha chuan amah hualtu Villarreal defender rual karah ṭha zetin ball a thlawh lut a, Araujo chuan si phurh sut nan a lo tauh lut.

Ngumoha inrintawkna leh thiamna sawi hmaih theih a ni lo a, Araujo tlan luh dan a fuh bawk - kum 18 mi Ngumoha hi Liverpool tana Champions League-a assist nei thei naupang ber a ni a, he tah hian a la tawp lo cheu!

Minute 65-naah Ngumoha bawk kan hmu nawn. Amah vengtu tam tak tlan pelin, ṭha takin ball a thlawh lut a, Mac Allister-a'n goal-ah a lo chantir - Reds-in 3-2 in hma an hruai a, dinhmun ṭha zawkah an ding.

Hello Wirtz

Liverpool-in Anfield-ah 3-2 in hma an hruai a, chak tur a chiang titih tawh. Minute 68-naah bench aṭanga luhtir Wirtz-a hun a inher chhuak ve leh a, Cody Gakpo siamsak chu tun season-a a goal hmasa ber ni turin a khung - Wirtz a che ṭha zel e.

A tira 2-0 a hnufual Reds-in si hnih faiin hma an hruai a, hun tawp hnaih lamah erawh an hlauthawng leh hram - Tani Oluwaseyi chuan Villarreal tan a khung ve leh a, mahse, minute 87-na a nih tawh avangin an comeback thei ta lo.

Liverpool-in hnehna an chang a, tlarhnung thawm phui erawh a la ngai hle tih a lang. Merseyside club hian Pathianni zan dar 7:30-ah Premier League match khel turin Brighton & Hove Albion an mikhual zui dawn a, goal khung uar Brighton lakah tlarhnung phui a pawimawh dawn.