Bournemouth hmachhawn tur AC Milan

Zanin dar 12:30-ah Europa League-ah Premier League club Bournemouth chuan AC Milan an hmachhawn dawn a, vawi hnih chaka panganaa awm mek Cherries tan Italian club lian hi fiahna hautak a ni ang.

Season hmasa khan Bournemouth hi parukna an nih avangin an club chanchina a vawi khatna atan Europa League an khel a. Premier League-ah che ṭha tawk lo mah se, Cherries hian Real Sociedad leh Sturm Graz te an hneh tawh a, Milan hneh leh an tum dawn.

Marco Rose-a naute zingah club liante awh rawn Alex Scott chu hliam vangin a la inkhel thei dawn lo a, Julian Araujo leh season hmasaa che ṭha tak Eli Junior Kroupi te an inlan theih a rinawm loh bawk.

Chutihrualin match hnuhnung pahniha goal khungtu Evanilson a dam ṭha a, World Cup-a Brazil tana hmun chang pha Rayan bakah Justin Kluivert an neih bawk avangin hlauthawng lutuk tur an ni lo.

Milan tan erawh Alexis Saelemaekers leh Matteo Gabbia te chiah hliam an awm a, Ruben Amorim-a'n duhthlan tur a ngah dawn. Milan player zingah Premier League club hrechiang Omari Hutchinson, Kyle Walker bakah Ruben Loftus-Cheek te an awm a, khualmuala khel tur ni mah se Milan an inthlahrung lo ang.

Premier League club dang Sunderland chuan dar 10:15-ah Lech Poznan an lenchilh dawn a, Crystal Palace chuan Turkish club Besiktas an tlawh dawn bawk.