Perez-a'n chawlh a tum hnai?

Cadillac driver Sergio Perez chuan a fate a ngaihtuah vangin chawlh a rilruk a, a hun tur sawi chiang lo mah se Formula 1-a a zinkawng chuan tawp lam a hnaih thu a sawi.

Kum 36 mi Perez chuan, "F1 en ṭhin chuan nuam ka tihzia an hria ang, sang taka Cadillac dah hi ka duh dan a ni a, mahse thil awlsam a ni lo. Kum eng emaw zat chu nghah a la ngai dawn a, chumi hunah chuan ka awm tawh lo hial ang.

Tun dinhmunah chuan inelnaa tel chhunzawm zel aiin chawlh lam ka hnaih tawh zawk a, chuvangin ka chawlh hma hi chuan a nuam thei ang bera ka hun hman ka duh a ni.

F1 chawlhsan ka rilruk chhan tak erawh ka fate vang a ni. Fernando Alonso te anga rei tak chhung intlansiak theih chu a châkawm, mahse ka fate hi hun tam zawk hmanpui an mamawh hunlai tak a ni. Inelna ropui tak hi ṭha taka thlah ka duh a, ka chawlh hun tur pawh ka tichiang thuai ang," a ti.

Mexican driver hi kum 2024 season-ah a chet ṭhat tawk loh avangin December 2024 khan an chhuahtir a, thla riat chhung team a nei loa a awm hnuah nikum August khan Cadillac a zawm.

Kum 2011-a F1 a luhchilh hnuah Perez hian Sauber, McLaren, Force India, Racing Point leh Red Bull Racing te a lo zawm tawh a, Cadillac hi a team parukna chiah an ni. tun season tawp hnuah a chawl a nih chuan Cadillac-ah kum khat bak a awm hman dawn lo tihna a ni.