Mizoram U15 League Zanin dar 7:00-ah Dream Final

Mizoram Under 15 League-ah team ṭha pahnih Tata Trusts COE leh Aizawl FC ten zanin dar 7:00 hian Lammualah final an khel dawn. Nomawi inchuh turte hi league round-ah 2-2 in an inhnehtawk a, table-ah pakhatna leh pahnihna an nih bakah nikum final rematch a nih bawk avangin 'Dream Final' tiha sawi theih a ni.

Champion lai Tata Trusts COE hi India football team tana technical director hna chelh tawh Colm Joseph Toal hnuaiah an awm a, NorthEast-a player ṭha lak khawm tiha sawi theih an ni. Mizoramin player ngah berin Manipur, Nagaland, Assam leh Meghalaya aṭangin player an awm.

Amaherawhchu, COE hian India Under 15 player Isac Zomuanpuia leh striker ṭha Rohlupuia te chu hliam vangin final atan an dinhmun a chiang lo. Chutihrualin defender F. Lalremtluanga (Mizoram Under 14 captain) leh winger Emboklang te chuan mawhphurhna an la thei ang a, player ṭha pahnih hi India Under 16 probables-ah tel an ni.

Aizawl FC hian league round-ah COE leh M28 Football Academy an draw tih lo chu an la chak vek a, tualchhung football hrechiang coach Nicky Malsawmtluanga leh H. Lalnunzira ten an enkawl bawk. AFC coach Zirtea chuan, "Kan intum hmasak ṭum khan James Lalruatfela leh Lalthlamuanpuia ten kan tan goal an khung a, minute nga te chu neih belh ila kan chak mai kan ring," tiin COE an hlauh loh thu a sawi.

Aizawl FC hian nikum inelnaa best forward Lalthanpuia an la kawl a, tun ṭumah pawh goal khung khawl ber a nih avangin COE tan ven uluk a ṭul ang. Thanpuia hian semifinal-a Kulikawn FC 3-0 an hneh ṭum pawhin goal hnih a khung.

Semifinal - November 7, Ningani

Tata Trusts COE    2 - 1    Aizawl Grassroots Centre

COE : F. Lalremtluanga 43'; Isac Zomuanpuia 51'

AGC : Lalrinchhana 18'

Aizawl FC    3 - 0    Kulikawn FC

AFC : Lalthanpuia 1', 17'; Hmingchungnunga 8'

Final - Zanin Inkhel Tur

Tata Trusts COE 07:00 PM Aizawl FC