McTominay-a'n goal a khung leh ta

Scott McTominay chu hlawhtling taka an zai hnuah a lo kir leh tawh a, a dam tawh tih lantirin Thawhlehni zana Bodo/Glimt nen Champions League-a an inhmachhawn ṭumin goal hnih a khung a, 4-3 in a team a chakpui.

Stadio Diego Armando Maradona-a inkhelah McTominay bakah hian Matteo Politano-a'n goal khat a khung bakah Odin Bjortuft-a'n an lamah a tilut a, Bodo Glimt tan Jens Petter Hauge Andreas Helmersen leh Sondre Brunstad Fet ten goal khung chu point hlawh chhuah nan a tawk lo.

Kum 29 mi McTominay hi thla hmasa khan a lung phut dan a dik lo tih hmuh chhuah a ni a, zai tura hmalak nghal niin September 8 khan hlawhtling takin an zai a, zai a tawh hnuah October 11, Pathianni zan khan a vawi khat nan a inkhel a, Frosinone lakah bench aṭangin a tlan lut.

Hemi hnu hian McTominay hian match hnih a khel leh tawh a, tun hnaia che ṭha lo tak Napoli tan goal a rawn khung leh tak avangin Massimiliano Allegri tan a thlamuanthlak sawt ang.

McTominay hi tun hnaiah Real Madrid-in lak luh an duh tia sawi a tam a, thu chiang engmah awm lo mah se Real enkawltu hi Manchester United-a a pu hlui Jose Mourinho a nih avangin a pan hreh a rinawm loh.