Jablonec lakah Mitoma khel dawn lo

Japanese forward Kaoru Mitoma chu a hliam a la dam chian loh avangina chawlh rih a la ngai dawn a, zanin dar 10:15-a Jablonec an hmachhawn hunah a inlan ve dawn lo.

Kum 29 mi Mitoma hi kumin May khan a inhliam a, a hliam hi endik a nih hnuah a chawlh rei a ngaih dawn avangin World Cup-ah pawh an ram tan a fehchhuak ve lo.

Tun hnaiah Mitoma hian hma a sawn a, a inlan thei tawh mai dawna sawi a tam hman hle. Mahse Mitoma hi a la dam chiang lo a, khelmual chhunga inlan leh turin kar hnih bawr vel tal a nghah a la ngai dawn a, November 8 zana Brentford an mikhual hunah Seagulls hian a inlan theih an beisei.

Mitoma bakah hian Evan Ferguson, Stefanos Tzimas, Femi Azeez, Pascal Struijk, Mats Wieffer, Yankuba Minteh leh Zadok Yohanna te an inhliam bawk a, an dam ṭhat lai a ni lo.

Hliam ngah mah se Seagulls an buai phah lo a, season duhawm tak hmangin Premier League-ah Manchester City leh Arsenal chiah an tluk lo a, pathumnaah an awm mek.

An match hnuhnung pangaah hnehna chang vekin goal hnih ai tam an khung vek a, goal hnih chiah an chhuah thung. An hmachhawn zingah hian Manchester United leh Arsenal an tel a ni.

Fabian Hürzeler-a hote hi Conference League-ah pawh bul an ṭan ṭha a, an match hmasa berah Kauno Žalgiris chu 4-0 in an sawp. Zaninah pawh Seagulls hi chak tura beisei a ni a, mipui thlir an hlawh leh ang.