Norwich striker hlui Pukki chawl dawn

Norwich City striker hlui Teemu Pukki chuan inkhelh a chawlhsan tur thu a puang a, a khelh mekna HJK Helsinki tan an hmabak match li a khelh zawh hunah a chawlh dawn tih instagram kaltlangin a sawi.

Kum 36 mi Pukki chuan, "Naupang ka nih lai aṭanga ka suangtuah phak loh tih tam tak chu football vangin ka neih thei. Football-in hun duhawm leh hlu tak min pekte kha khawiah mah ka tawng leh tawh ngai lo ang.

Ka khelh tawhna club leh min ṭantute zawng zawng chungah lawmthu ka sawi a, football zinkawngah hian hnual chang tam tak nei mah ila nuam ka tihna a reh phah lo a, inkhelh ka chawlhsan hunah pawh football ka ngainatna hi a bo lo ang," a ti.

Finnish striker Pukki hian kum 2006 khan an ram club KTP-ah bul a ṭan a, kum hnih a khelh hnuah Sevilla reserve team zawmin season khat a khelhsak a, first team tan vawi khat a inlan ve hman.

Hemi hnu hian an ramah bawk let lehin HJK tan a khel leh a, a chet ṭhat avangin season khat hnu lawkah Schalke-in an la lut a, mahse beisei a phâk loh avangin Celtic a zawm. Scottish club hnuah Brondby-a a zawm leh a, Denmark club-ah hian a hming chherin Norwich-in 2018 khan an la lut.

Pukki hi Norwich-ah kum nga awmin match 210 a khel a, goal 88 khungin Premier League-ah Canaries hi vawi hnih a kaipui. Kum 2023-a Norwich a chhuahsan hnuah Minnesota United tan season khat a khel leh a, nikum khan HJK hi zawmin a club hnuhnung ber tur a ni.

Nikum khan Pukki hian an ram tan inkhelh a lo chawlhsan tawh a, Finland tan match 133 khelin goal 43 a khung a, an ram tana goal khung hnem ber a nih bakah inlan hnem ber dawttu a ni bawk.