Peta-in Palace mascot thlak turin duh

People for the Ethical Treatment of Animals (Peta) chuan Premier League club Crystal Palace chu an mascot atana an hman 'mupui' chu thlak turin an ngen a, ri bengchheng takin a uapna khelmual chhung chu an awmna tur hmun a nih loh thu an sawi.

Crystal Palace hi kum 1973 aṭang khan Eagles tih hming an pu ṭan a, kum 2010 aṭang an mascot atan 'mupui' tak tak, Kayla tia an koh chu hmangin an inkhelh hmain stadium chhungah an thlawh kualtir ṭhin.

Kayla hi 2020 khan a thi a, hemi hnu hian mupui dang "Phoenix' chuan thlakin 2024 August-a West Ham an mikhual aṭang khan an hmang leh ṭan, tun thlengin Phoenix hi an la hman chhunzawm.

Peta chuan savate hian stadium chhung boruak ang hi hlauhna n nei ve thei a, chu bakah an nunphungah mihringte nena khawsa ho tur an ni lo a, mascot anga hman zel a nih phei chuan an hriselnain a tawrh theih thu an sawi.

He pawl hian infiamna huangah sava chauh ni loin, ransa dang hliam tawrh tawhna leh entu mipuite tan hlauhawm tura an chet tawh dan record an kawl vek a, kum 2017-a Palace leh Charlton Athletic an inhmachhawn ṭuma, fan pakhatin Kayla hnek a lo tum tawh pawh an chhinchhiah vek.

Peta senior corporate project manager chuan, "Infiamna hrang hranga team tam takin mascot atan mihring an nei ṭheuh ṭhin a, Palace pawh hian mipui tiphur turin 'Pete the Eagle' an nei sa. Mascot atana an hman mupui tak tak hi zalenna lantirna atan hman ṭhin a ni a, Palace fans tana ennawm nih aia ṭha hi an phu a ni," a ti.