Chennaiyin an tlawm leh tawh

Indian Super League-ah Chennaiyin an chak hleithei lo a, Pathianni zan khan an mikhualna ramah Bengaluru FC chu 3-0 a ngam loin an tlawm - match li an khelhah point khat chiah an la nei!

Bangalore club tan Erik Paartalu, Sunil Chhetri leh Semboi Haokip te chuan goal khat ṭheuh an khung a, Chennai club-in a chhanletna tur an nei lo. Chennaiyin coach John Gregory chuan a hun tawn hrehawm ber a tawn mek thu a sawi zui a, he thuziak i chhiar meuh chuan English coach hi a lo bang fel tawh hial mai thei. 

Aston Villa coach hlui chuan, "Hetiang em em hian ka la thawkrim ngai lo. Midang tan hmun hi luah a ngai ve tawh a ni mahna. Dik taka sawi chuan he hmuna ka hun tawn hrehawm ber ka tawng mek a, club hi a hmasa bera dah tur a nih avangin club tana ṭha tur bera thutlukna siam a ngai a ni," a ti. 

John Gregory hian Bengaluru nena an inkhelah Lallianzuala Chhangte chu bench aṭangin a luhtir a, Jerry Lalrinzuala chuan bench lamah hun a hmang tluan thung. Jeje Lalpekhlua chu hliam vangin a la inlan thei lo. Gregory hian 2017-18 khan a season hmasa berah Chennaiyin hi a champion pui nghal a, mahse season hmasa ṭantir aṭang khan league match 22-ah vawi hnih chiah a team a la chakpui a, vawi 16 ngawt an tlawm!