Goa-ah Aizawl FC an chak lo

Aizawl FC chuan I League-ah match hnih a zawna an chak hnuah Inrinni tlai khan Churchill Brothers 2-1 in an hneh lo. Mizo club hian February 23, Pathianni hian JN Stadium, Chennai-ah Chennai City FC an hmachhawn ang.

First half-ah goal chance hmuh tur a tam lo a, goal thum hi second half-a lut vek a ni. Minute 74-naah Dawda Ceesay-a'n box pawn aṭangin mawi zetin a pet kum lut a, keeper Zothanmawia tan tih theih a awm lo.

AFC-in injury time-ah Paul Ramfangzauva hmangin siphurh an sut a, Kolasib tlangval hian box pawn chiahah a ke dinglama la thlain vei lamin kawh zetin a pet goal.

An inhnehtawk tura ngaih a nih hnuah Willis Plaza-a'n buai nuaih kar aṭangin Churchill Brothers chakna goal a khung a, Goan club an vannei.

Zirtawpni zan inkhelah Mohun Bagan-in Neroca 6-2 in an sawp a, Kolkata club-in nomawi an hnaih zel. Mariners tan Fran Gonzalez-a'n hattrick a siam a, Fran Morante, Baba Diawara leh Alexander Romario Jesuraj ten goal khat ṭheuh an khung. Kolkata club defender Dhanachandra Singh chu minute 60-naah hnawhchhuah ni mah se Manipur club lakah an talbuai phah lo.