FA Cup Premier League club inlan ṭan hun

Football knock out tourna­ment upa ber FA Cup third round chu zanin aṭangin khelh ṭan a ni dawn a, round hmasa lama la inlan lo Premier League club te tan inelna bulṭanna tur a ni ang; club lian zingah hmabak hautak tak hmachhawn nghal tur an awm lo.

Champion lai Chelsea chuan Nottingham Forest an mikhual dawn a, manager lailawk Ole Gunnar Solskjaer kaihhruaina hnuaia harh tharna chang Man­chester United pawhin Old Trafford-ah Reading an hmachhawn ang.

Manchester United leh Rea­ding te hi FA Cup bikah ṭum 14 ngawt an inhmachhawn tawh, 1927 January thla khan United hi an chak lo a, a hnu lamah chuan a chak zawk an la ni vek - an sulhnu thlir chuan Man United hi harsa lutuk loa tlang tura ngaih an ni.

Hliam dam hlim Marouane Fellaini, Fred leh Diogo Dalot te an inlan theih a beiseiawm a, match hnuhnung bera inlan thei Alexis Sanchez pawh inkhel zui tura rin a ni. Nikum September thla hnua a vawi khat nan goalkeeper Sergio Romero tan hun ṭha a inhawng bawk ang.

Reading tan hian Manches­ter United defender hlui John O'Shea a awm dawn, kum 10 chuang hun a hman tawhna Old Trafford-ah O'Shea hi a mikhual lo ang; United tan hian league nomawi panga bakah Champions League, FA Cup leh League Cup te a chawi tawh.

Reading manager Jose Gomes chuan, "Team ṭha leh khauh tak kan hmachhawn dawn a, tun hma zawng aiin an player hian inkhelh nuam an ti niin a lang a, a awlsam lo ang. Mahse, Old Trafford boruak hi tun hmain ka tem tawh, Porto-ah khan assistant coach ka nih laiin United khelmualah hian kan lenglut tawh, kan coach kha stand-ah a awm avangin team ka enkawl tawh a ni," tiin a sawi. 

Season hmasa khan Chelsea hian final-ah Manchester Uni­ted hnehin nomawi an chawi a, manager Antonio Conte chuan a dinhmun a hum zo chuang lo. Manager thar Maurizio Sarri tan Nottingham Forest hmachhawn hi chona thar a ni thung dawn. 

Italian manager hian Chelsea a enkawl hnuah nomawi chawi nghal a tum tih a chiang, league chu a ngaih pawimawh ni mah se Europa League lamah pawh player ṭha a chhawr ṭhin a, hei vang hian zaninah pawh chak ngei tumin a naute a rem ang.

Mipui 41,631 lenna Stam­ford Bridge-ah mikhual fans tan ticket 3,000 pekchhuah a ni a, Championship table-a pasarihna ni lai Nottingham Forest ṭantute hi Blues fans lamin an hliah hneh viau tura ngaih a ni.

Stamford Bridge-ah hian FA Cup third round bikah Premier League club hnuai lam team 13 an lenglut tawh a, hnehna chang an la awm lo; Blues hian goal 45 khungin anmahni lamah goal ruk chiah a lut thung.

FA Cup-ah hian champion hnem ber chu Arsenal niin, North London club hian vawi 13 nomawi an chawi tawh. Manager thar Unai Emery pawhin an club sulhnu ṭha hi a hmuhhmaih lo a, chhawm nun ngei a tum thu a sawi.

Gunners manager Emery chuan, "Inelna hi English team ten an ngaihlu hle tih ka hria, team tam takin hun ṭha an neihna a nih avangin a danglam hle bawk. He hmuna ka rawn kal tirh khan nomawi chawi theih zawng zawng chawi pui ka tum a, kan club hian final vawi 20 ngawt a khelh tawhna a nih avangin FA Cup-ah pawh beiseina kan nei sang," a ti.

A player neih lai chung­chang­ah Spanish manager hian Aaron Ramsey leh Juventus sawizawm a nih chungchang aiin Blackpool nen an inkhelh tur chu a pawimawh zawk thu a sawi a, tun hnaia a chhawr mumal loh midfielder Mesut Ozil chu, "Inkhel tura a inpeih hun ka nghak," tiin a sawi.

Kum 67 mi Emery chuan, "Player tin hi inelna thianghlim nei turin ka duh a, tun ṭuma kan inkhelh turah pawh hian ni danga khel tam lo zawkte pawhin hun an nei ang. Season a la rei dawn a, inelna a hautak em em avangin player chhawr theih kan ngah a ngai a ni," a ti.