Inter Kashi khelmualah East Bengal

Indian Super League chu vawiinah khelh chhunzawm a ni leh dawn ta a, tlai dar 5:00-ah East Bengal chuan Inter Kashi an lenchilh ang. Kolkata club hian season hmasa khan an match hnuhnung berah Inter Kashi hi hnehin, ISL nomawi an lo chawi tawh a, zaninah an intawng leh dawn ta.

East Bengal hian AFC Champions League Two an khelh avangin ISL-ah match khat chauh an la khel a, an match hmasa berah Churchill Brothers chu 4-0 in an sawp nghal. Mizo forward Edmund Lalrindika chuan goal khungin, a goal hi David Lalhlansanga siamsak a ni bawk.

Inter Kashi hi Varanasi club ni mah se, tun season-ah an home match chu Pune khawpuiah an khel a, East Bengal tan khualmuala inkhelh a hautak dawn - karleh Thawhlehni zanah AFC CL Two match an nei bawk si a, coach Antonio Habas tan squad siksawi thiam a ṭul ang.

Spanish coach hi ISL-a Inter Kashi hruai thlengtu a ni a, Edmund-a'n Varanasi club tan a lo khel tawh bawk - an club hlui lakah hnehna chan an tum dawn. East Bengal-ah hian Edmund, David leh defender Lalchununga te chu Mizo awm an ni a, a tirah Vanlalpeka Guite (Sentea) chu squad-a awm angin tarlan ni mah se, Sentea hian IFL club Chanmari FC a zawm tawh a ni.