Inkhelh thiam lo United an mualpho

Manchester United fan-ten hlim taka Champions League an khelh tur thu an sawina kha a la rei lo. Mahse, hlim leh lawm taka an pan inelnaah chuan tihmualphoin an awm a, a zawnin match hnih an tlawm ta.

English club ropui United hi Serie A club tenau Como lakah 4-1 in an tlawm a, Champions League match thum an khelh tawhah vawi khat chiah an la chak - an chak awmchhun hi Azerbaijan club Sabah FK 4-0 a an hneh kha a ni.

Como tan Nico Paz chuan goal hnih khungin, Tasos Douvikas leh Jacobo Ramon ten goal khat ve ve an khung bawk a, hun pek belha Joshua Zirkzee-a goal khungin United mualphona a khuh phak lo.

A har a ni!

"Aw, a har ka ti mange..." tih chu tunlai United hlapui a ni a, har an ti em em reng mai a ni! Como khelmualah pawh Red Devils an hrang thei lo a, Serie A club hian inkhelh an lo zirtir a ni ber mai.

Como hian minute hnihna lekah goal hmahruai an khung nghal a, playmaker Nico Paz chuan Lucas Da Cunha siamsak chu mawi zetin goal-ah a chantir - Argentine player thiamna hmuhtirin kan awm a ni ber e.

United inrin hmain Como-in goal an khung a, inkhel an thunun zui bawk. Red Devils player-ten ball in pass dik ringawt pawh harsa an ti a, awmze neia an nawr theih bawk loh avangin an khel en a hahthlak takzet.

A hming Paz

Michael Carrick-a'n beidawng takin a naute inkhel a en a, thlak danglam a ngai tih a hria. Minute 45-naah Andrey Santos leh Matheus Cunha te a la chhuak a, Carlos Baleba leh Amad Diallo a luhtir.

Mahse, United inkhel a danglam phah lo a, goal an chhuah belh! Second half ṭan aṭanga minute lina lekah Nico Paz-a siamsak chu Douvikas chuan goal-ah a chantir a, Paz hian minute 57-naah a belhchhah zui!

United captain Bruno Fernandes pawh lak chhuah a ni a, engmah a danglam phah chuang lo. Ramon-a'n Como tan a khung belh a, 4-0 a ni der! Hun pek belhah Zirkzee chuan United tan khung ve mah se, goal an chhuah tam hret a, awmzia a nei phak tawh lo.