Bayern leh Arsenal an inhnehtawk
Nilaini zan Champions League inkhela en châkawm bera chhal ngamah Bayern Munich-in Arsenal an mikhual a, team pahnih hi chak zawk awm loin an inṭhen. 2-2 in an inhnehtawk a, Arsenal an lawm zawk ang.
Gunners hian Eberechi Eze hmangin goal hmahruai khung mah se, German champion hian Alphonso Davies leh Harry Kane-a penalty hmangin an chhanglet a, minute 80 thleng pawha 2-1 a nih avangin Bayern hi an chak dawn niin a lang tawh.
Mahse, Premier League champion-in German champion ngam loh ngawt an duh lo. Minute 82-naah Declan Rice-a'n goal khat khung ve lehin, si phurh a sut a, hun tawp thlenga goal dang lut loin team pahnih an inhnehtawk.
Tuarna pawh hlawkna
Allianz Arena-a inkhelah, Arsenal-in inkhel ṭantir aṭangin ball an chang tam a, khualmualah chak an tum tih an pholang. Mahse, minute 10-na lekah hliam vangin Bukayo Saka lakchhuah a ngai a, Mikel Arteta-a'n a duh aia hmain player a siksawi a ṭul.
Saka aiah Eze a lut a, mahse, tuarna pawh hlawkna a lo ni! Minute 25-naah Martin Odegaard-a ball pek ṭha zet chu Eze-a'n um lutin, Arsenal tana bul ṭan a phuzia pholan nan a hmang a, 1-0 in hma an hruai.
Mahse, Bayern-in mahni mualah tlawm an duh lo. Midfield-a tawlh let fo Kane-a'n Arsenal tlarhnung ṭhiatin, mawi zetin ball a thawlh lut a, Alphonso Davies tan si phurh sut nana hman mai loh chu tih tur dang a awm lo.
A hmuhnawm zel
Bayern-in hrem vangin Michael Olise an chhawr thei lo a, a chhungte thihna avangin Joshua Kimmich a tel lo bawk. Game thlir thiam leh ball pass thiam pahnih an awm loh avangin 'playmaker' ang deuhthawin Kane a khel a, a ball pass a hmuhnawm ṭhin asin aw!
Minute 61-naah Kane kan hmu leh a, English striker-in goal-a a shot chu Jurrien Timber-a'n a kutin a lo tawk fuh a, penalty a chawi - a pet turin Kane a lo pen chhuak a, a hlah lo chiang hle.
Allianz Arena-ah, Bayern lakah 2-1 in an hnufual a, team dang ni se, an beidawng tawh ang. Mahse, Arsenal an ni miau a, an tlawm ve lo. Hun tawp nan minute riat chiah a awm tawh tihah, bench aṭanga luhtir Viktor Gyokeres leh Rice ten mawi zetin ball an inpe a, Rice-a'n si phurh sutna goal a khung zui.
A chiang lo
Saka a inhliam a, Arteta chuan a player dinhmun a chian loh thu a sawi. Spanish coach chuan, "Kan tan chuan chanchin lawmawm lo a ni a, eng ang taka na nge a nih hre tur erawhin kan nghah a ngai," a ti.
Saka hi hliamin a tlakbuak ngun hle. March-ah khan a inhliam vangin Gunners match sarih ngawt a khel thei lo tawh a, 2024-25 season khan ni 101 zet chu a malpui hliam vangin a lo chawl tawh bawk.
Mahse, Arsenal-in Allianz Arena-ah point an hmuh avangin an lunghnur lutuk tur a zia deuh. Inrinni zan dar 7:30-ah league match khelin Everton an mikhual zui leh ang.