Most promising boxer-ah Mizo tlangval Mala

75th Inter Services Boxing Championship 2026-2027-ah Malsawmtluanga chuan 75-80 kg category final-ah nimin tlai khan Army Green boxer Arman (Haryana) chu unanimous decision (5-0) a hnehin a champion. Lunglei Electric Veng tlangval Mala hi most promising boxer-a thlan a ni a, World Boxing Cup Finals 2026 neih turah India aiawh khel turin thlan a ni bawk.

Mala hian semifinal ngaihven hlawhah Mizo boxer ṭha Johnkenty Vanlalhlimpuia a hneh a, inhnek zawhah amah aia senior Johnkenty chungah zahna a lantir leh bawk avangin Mizo boxing ngainatute zingah a tla nak belhchhah hle.

Indian Army boxer Mala chuan, "Ka chungte min ṭawngtaipuina vanga tun dinhmun thleng thei ka ni a. Ka sawi hmaih theih ngai lo tur chu boxing min zirtirtu ka basic coach Lalfakzuala leh Ch. Lalmuanpuia te an ni a, an chungah ka lawm takzet a ni," tiin Vanglaini a hrilh.

Mizo tlangval telna tur World Boxing Cup Finals 2026 hi November 26 - December 4, 2026 chhung hian Tashkent, Uzbekistan-ah neih a ni dawn. He inelna hi kum 2027 leh 2028-a Olympic khel tur zawnna qualifying competition atana seeding siamna tur a nih avangin a pawimawh hle.