Goal khung thiam Real Madrid

Real Madrid-in Nilaini zan khan RB Leipzig mikhualin 4-1 in an sawp a, Jose Mourinho hote hian a zawnin match thum chhung goal li an khung tawh. Los Blancos tan Bernardo Silva, Arda Guler, Kylian Mbappe leh Yan Diomande ten goal khat ṭheuh an khung a, German club tan Tidiam Gomis-a'n goal khat a khung ve bawk.

Santiago Bernabéu-ah nung takin inkhel an ṭan a, Real goal bawh a na a, Leipzig-in an hlau bik lo. Kylian Mbappe-a'n a chance neih ṭhat hmasak goal zawnah a pet thei lo a, Real tlarhnung a phui lo. Thibaut Courtois-a'n Leipzig striker Rômulo Cardoso goal khung tur a dang ṭha takzet.

Goal chance ṭha an inneih chhawk a, Vini Jr goal khung tur pawh Leipzig keeper Maarten Vandevoordt-a'n a dang ṭha. Jude Bellingham erawhin goal zawnah a pet thei lo. Leizpig forward Christopher Nkunku-a'n keeper chauh a hmachhawn hnuah a khung thei lo a, Real lamin vaw letin Bernardo Silva hmangin an khung.

Arda Guler, Kylian Mbappe leh Federico Valverde ten Leipzig tlarhnung an ṭhiat ṭha a, a tawpah erawh vanneihna an mamawh tel. Guler-a ball pet chu keeper Vandevoordt ke pahnih a per hnuah a tlang a, Bernardo Silva-a'n goal ruakah a pet lut.

First half-ah 1-0 a ni a, second half-ah mualneitu lamin an khung hma leh bawk. Valverde-a'n chance ṭha a hlah nghal a, minute 52-naah Arda Guler hmangin an khung tho. Turkish midfielder hi a hmawr bawktu ni mah se hna harsa thawktu chu Bellingham leh Mbappe te an ni. Bellingham-a cross hi Mbappe-a'n goal-ah a tauh a, goal line aṭangin Guler-a'n a ti lut.

Minute 83-naah Mbappe-a'n ama pualin goal a khung tho a, box chhung chiah aṭangin substitute Yan Diomande pek chu goal-ah mawi zetin a hlai lut. Minute hnih hnuah Leipzig-in ṭha taka Real tlarhnung ṭhiatin Gomis hmangin an sut ṭhen.

Mahse, Diomande-a'n goal ropui hlap lut. Real substitute pahnih an inthlawp ṭha a, Brahim Diaz-a ball vawrh chu boruaka a awm laiin Diomande hian kawh zetin a volley lut. Real Madrid 4-1 in an chak a, a tawpah chak chiang mah se tlarhnung erawh a phui lo. Mourinho hote hian match hnuhnung pathumah goal li khung vek mah se goal an chhuah vek!