Lakers tan Kessler a vul nghal

Los Angeles Lakers chuan nimin zing khan season thar atana an match hmasa ber khelin, Golden State Warriors chu 127-105 in an hneh a, Lakers tan an player thar Walker Kessler chuan point score hnem berin a team thar tan a ṭangkai nghal.

Crypto.com Arena, Los Angeles-a inkhelah team pahnihte an inhlau lo tawn a, hma an inhruai chhawk zak zak. Luka Doncic leh Kessler te an inman a, Austin Reaves-a'n a khat tawkin point a nei ve reng bawk.

Warriors tan Stephen Curry a langsar leh ber a, American point guard hian first quarter-ah point 16 a score nghal a, amah ang bawka veteran player Draymond Green a che ṭha bawk a, first quarter-ah 34-33 chauhin an hnufual zawk.

Second quarter-ah pawh team pahnihte an la inhnehtawk viau a, Curry bakah Gui Santos leh Brandon Williams ten Warriors tan point an rawn thawk chhuak. Mahse Lakers an inthlahdah duh lo a, 'paint area'-ah Kessler a hnawk takzet a, 'three points' an mamawh laiin Jake LaRavia a inlar bawk.

Quarter tawp lamah Warriors an inthlahdah a, an point kal lai titawp turin defence-ah Kessler a che ṭha hle. Lakers erawh an tlahniam ve lo a, second quarter tawp nan second thum chiah a awm tawh tihah, Doncic-a'n court chanve aṭangin 'three points' a vawm lut zui a, 66-52 in chawlhlawk an hmang.

Second half ṭantir aṭangin Lakers bawk an langsar a, Kessler chuan Doncic leh Reaves te hnen aṭanga a ball hmuh a hlah duh lo. Kessler bakah Ziaire Williams-a'n point a rawn score ve

ṭan bawk.

Warriors erawh an insiamṭha hleithei lo a, an thiampuipa Curry a luh tlem tawh avangin point score lamah hma an sawn thei tawh lo. Third quarter-ah point 16 chauh neiin 102-68 in an inthlau a, chak tur a chiang titih tawh.

Fourth quarter-ah theihtawpin Warriors-in an bei let a, Williams, Santos leh Graham Ike ten hoin point 37 zet an score a, mahse second leh third quarter-a an chet ṭhat tawk loh an tuar.

Lakers tan Kessler kut kal lai a tawp lo a, kum 25 mi American center hian vawi 10 dunk nei tlingin, Lakers tan kum 2003 hnua Shaquille O'Neal hnua hetiang ti leh thei hmasa ber a ni. Hun tawp thlengin a chungnung zawka an ṭan theih nan a thawh hlawk takzet.

October 24, Inrinni zing dar 7:30-ah Lakers hian Los Angeles Clippers an hmachhawn leh nghal dawn a, Warriors laka an chak avangin inrintawkna an ngah sawt ang.

Warriors pawhin Inrinni zing vek hian Memphis Grizzlies an hmachhawn ve dawn bawk a, hnehna chan an duh a nih chuan player naupang leh tha za zawkte an ṭan lehzual a ngai tawh ang.