Vanneihna nen Inter an chak

Nilaini zan Champions League khelhah Italian champion Inter Milan chuan player kim loa an khelh hnuah, si khat faiin Shakhtar Donetsk an hneh hram a, goal awmchhun hi Carlos Augusto khung a ni.

San Siro-a inkhelah team pahnihten chance insiam harsat lo mah se a pawimawh ber goal khung an harsat a, first half-ah goal a lut lo.

Second half-ah thil a danglam tam lo a, minute 68-naah yellow card hmu tawh Alessandro Bastoni-a'n ṭul lo taka Shakhtar midfielder Oleh Ocheretko hmaiah a nem avangin hnawhchhuah a ni.

Kim loa an khelh hnuah Inter bet zawkin Shakhtar-in an tlarhnung an rum ṭhaih nasa zual. Mahse, Inter-in counter attack hmang ṭangkaiin minute 77-naah Augusto-a'n Henrikh Mkhitaryan-a pass ṭha tak chu a khung a, an chakna goal a ni zui.

Inter coach Cristian Chivu chuan, "Bul kan ṭan chhe lo a, mahse player 10-a kan tlak hnuah kha chuan a hma aia kan ṭan lehzual a ngai tih kan hre ṭheuh. Khelh dan mawi tak hian kan result duh ang min pek loh châng a tam a, kan sual chhuah a ngai ṭhin. Chu chu vawina kan player te thiltih a ni," a ti.