Juventus chakna chu Paulo Dybala

Pathianni zan Serie A inkhelah Juventus chuan substitute Paulo Dybala-a goal khat hmangin AC Milan 1-0 in an hneh a, hamrik hnuhnung ber a rik hmain Cristiano Ronaldo chuan khelmual a chhuahsan.

Juve manager Maurizio Sarri chuan minute 55-naah Ronaldo hi la chhuakin Dybala a dahlut a, Argentine striker hian chakna goal awmchhun a khung. Real Madrid forward hlui erawh thlak a nih avangin a lawm lo tih a hriat thung.

Allianz Stadium-a inkhelah team pahnih an inchai tawk viau, mikhual Milan hi nem zawk tura ngaih ni mah se an ṭang khawng rei thei hle. Juve keeper Wojciech Szczesny chuan Krzysztof Piatek, Lucas Paqueta leh Theo Hernandez te goal khung tur chu ṭha takin a dansak.

Goal a lut har a, Italian champion Juventus lamin point an hloh thei dawn niin a lang hman. Mahse, Gonzalo Higuain-a ball pek dawngtu Dybala chuan box chhungah rang zeta la lutin goal ṭha bik a khung a, point thum hlu tak an sual chhuak a ni.

Tun season Serie A match 12 khelh tawhah Juve hian hneh loh an la tawng lo a, point 32 neiin an elpui Inter Milan aiin point hnihin an sang zawk. Chak lo Milan erawhin hma an sawn thei rih lo, point 13 chauh la neiin 14-na dinhmun an luah.

Italian manager Sarri-a'n player a siksawi nasa ṭhin a, chung zingah chuan star player Ronaldo pawh a bang bik lo. Portugal captain hi Champions League an khelh ṭumin minute 82-naah Dybala hian a rawn thlak tawh. Milan lakah Ronaldo a hriam tawk lo a, goal an mamawh vangin Sarri-a'n tlarhma tih danglam a duh. Argentine striker pahnih Higuain leh Dybala te an inkawp theih nan Real Madrid forward hlui hi minute 55-na lekah a thlak.

Kum 34 mi Ronaldo hi thlak a nih vangin a lawm lo tih a hmelah a lang a, khelmual a chhuahsan hian bench lama ṭhu loin inthlakna lamah a lut tlang nghal daih. Juve-in point thum an hmuh vanga an lawm laiin an player pawimawh chet dan chuan an rilru a ti khingbai deuh ang.

Cristiano Ronaldo chungchang sawiin Juve manager Sarri chuan, "Thla hmasa kha chuan a khupah hliam a nei a, inkhel turin a inpeih tawk lo. Dinhmun ṭha bera a la awm lo chunga inkhel tura a inpeih tawh hi a fakawin a lawmawm hle, amah pawh a lawm tur a ni.

"Cristiano nen hian buaina kan nei hran lo a, a teammate a zahlohna a ni em tih erawh ka sawi thei lo. Player tu pawhin ṭhahnemngai taka an khel a nih chuan, thlak an duh lo. Thlak an nih vang hian minute nga chhung vel chu an thinrim ṭhin ngei mai," tiin a sawi.

Ronaldo hi a kum a tam tawh a, match zawng zawnga chhawr theih a ni tawh lo. Chutihrualin inkhel pawimawh leh goal mamawh vanglai taka thlak a ni erawh a tuar thiam lo tih chu a lang. Lokomotiv Moscow an hneh ṭuma an thlak pawhin lungawi lo hmel a lo lantir tawh.

Inkhel dangah AS Roma chu Parma lakah 2-0 in an chak lo a, an tlawm avangin Roma hi a sang pathum zingah an awm phak tawh lo - point 22 neiin parukna dinhmun an luah. Europa League lama Borussia Moenchengladbach an ngam loh hnuah Roma an tho chhuak thei mai lo. Mualneitu Parma lamin Mattia Sprocati (68') leh Andreas Cornelius (90+3') te goal hmanga hnehna changin pariatnaah an inhlangkai.

Inkhel dangah Lazio chuan Lecce 4-2 in an hneh a, Serie A top scorer ni lai Ciro Immobile chuan season kal laia a goal 14-na a khung. Goal khung hnem lamah Inter Milan striker Romelu Lukaku (9 goals) a kalsan zel.