Pahnihnaah Aston Villa an chho

Unai Emery-a enkawl Aston Villa chuan Nilaini zan khan Champions League-ah 3-1 in Viking an hneh a, match thum an khelh tawhah chak vekin pahnihnaah an chho. An tluk loh awmchhun hi champion lai Paris St-Germain a ni.

Villa tan Ross Barkley leh Emiliano Buendia ten goal an khung bakah Viking defender Henrik Heggheim-a'n an lamah a tilut bawk. Hun tawp hma hreta Norwegian club tan Peter Christiansen-a goal khung chu a scoreline timawitu bak a ni pha lo.

Season hmasaah Villa hi palina ni phâkin, Champions League an khelh theih phah a, kuminah erawh Premier League-ah an che ṭha tawk lo a, match sarih khelh tawhah point riat chiah la hlawk chhuakin 12-naah an awm.

Premier League-ah beisei pha lo mah se Villa hi UCL-ah an che ṭha a, match thumah an chak vek. Pakhatna PSG nen an point hmuh zat leh goal difference pawh a inang a, goal an khung tlem zawk vang chauhin hmahruaitu an ni lo.

October 24, Inrinni tlai dar 5:00-ah Villa hian Manchester City an mikhual dawn a, EPL-a hneh loh nei lo an hmachhawn hmaa an match hnuhnung berah hnehna an chan avangin Villa an inringtawk sawt ang.