Page-a'n fighter te ṭang ho turin duh

UFC fighter hlui Michael Page chuan MMA fighter te chu intelkhawm a, hlawh sang zawk an neih theihna tur atana hma la turin a duh a, UFC khelte chuan hlawh tam zawk an phu tih a sawi bawk.

Kum 39 mi Page chuan, "Fighter zawng zawng hi kan ṭanrual a hma kan lak chuan keimahni bakah fighter lo la awm zel turte tan a ni. Fighter te tel loin UFC hi a kal thei lo a, Muhammad Ali Act ang chiah hi MMA-a hlawh sang zawk phu te hian kan mamawh a ni," a ti.

British fighter Page hian thla hmasa khan UFC a chhuahsan a, tun thlatir lam khan Misfits Boxing-ah contract a ziak. UFC a chhuahsan chhan hi infiamna dang nen khaikhina hlawh a tlem vang a ni a, an thu a inhmuh loh hnuah a chhuak.

Page hian 2023 khan UFC a luhchilh ṭan a, match ruk khel hmanin vawi nga a chak a, a hneh loh awmchhun hi Ian Machado Garry a ni. Misfits a zawm hnu hian UFC aiin a hlawh hnem dawn tih a lo sawi tawh.

Kumin Zuffa Boxing-a British boxer Conor Benn-a'n match khat atan, pound maktaduai 11 hlawh tura inremna a neih hnuah UFC-a fighter te hlawh hi infiammi leh chanchinbu mi tam takin an ngaihven ṭan.

Zuffa Boxing neitu hi UFC president Dana White tho a ni a, boxing leh MMA-a a boxer leh fighter te hlawh zat a pek dan inthlau lutuk avangin an sawisel nasa hle. Middleweight champion lai Sean Strickland pawhin na takin White a lo sawisel tawh a ni.