Semifinal-ah Djokovic

Tennis world number 1 Novak Djokovic chuan hneh loh nei loa season bul a ṭan chu a chhawm nung zel a, Ningani zan khan Nikoloz Basilashvili hnehin Qatar Open semifinal a lut a, final lut tur chuan Roberto Bautista Agut a paltlang leh a ngai ang.

Doha-a inkhelah Djokovic hian awlsam takin hnehna a chang mai bik lo, darkar hnih deuh thawh an inkhelh hnuah Serbian tlangval hi 4-6, 6-3, 6-4 in a chak zawkah a ṭang hram - kumina match thum a khelh tawhah chak vek mah se ṭum khat chiah straight set-in hnehna a la chang thei.

Nikum August thla khan Djokovic hian a match zawnin set a hloh hmasak hnuah hnehna a chang thei a, tun ṭumah hian a zawna set hloh hnuin hnehna a chang leh thei chiah; match lehpeka a tum tur Agut hian Grand Slam vawi thum champion tawh Stan Wawrinka chu 6-4, 6-4 a a hneh theih avangin Djokovic kalkawng a awlsam dawn lo.

Kum 31 mi Djokovic chuan, "Basilashvili lak aṭang chuan inkhel hautak hmachhawn kha ka beisei sa a ni a, a tir aṭangin a awlsam lo hle reng a ni. Tun lai player zinga ball vuak dik leh ṭha berte zinga mi a ni a, season duhawm a hman chhunzawm ka duhsak," tiin a sawi.

Ningania singles a khelh zawh hnuah Djokovic hi a unaupa Marko nen doubles huangah an inlan zui leh a, darkar khat leh minute nga hnuah David Goffin leh Pierre-Hugues Herbert te ṭangdun lakah 6-1, 3-6, 15-13 in an chak lo.

Mipa singles quarterfinal dangah Marco Cecchinato leh Tomas Berdych te chuan Dusan Lajovic leh Herbert te an hneh ve bawk a, anni pahnih hi semifinal-ah an intawng zui thung ang.