MPL8-ah tuten nge semifinal khel dawn?

Mizoram Premier League Season 8-ah team an intluk tlang tih chu season ṭantirh aṭangin sawi a awm tawh a, tunah chuan sawi chauh ni loin a takin a lang. Match thum chauh khelh tur a awm tawh chungin semifinal lut tur leh relegate tur hriatthiam a har takzet a, tun ṭumah hian knockout stage lut thei tur team bihchianna kan nei dawn a ni.

Aizawl FC-in an match hnuhnung berah Mizoram Police an inlehthaltir a, 5-1 a hman an hruai hnuah 6-5 in an chak lo. Amaherawhchu Standly Rosario hote hian point 24 an hmu tawh a, an khelh hmabak pathumah hian an chak lo vek a nih pawhin an tling pha tho dawn. Chutihrualin coach tawnhriat nei ṭha Standly-a'n semifinal inpuahchah nan match hmabak chak a pawimawh tih a hre chiang ang.

Mizoram Police hian Chhinga Veng FC, Ramhlun North leh Chawnpui FC te an la hmachhawn dawn. An fixtures thlirin Lalbiaksanga Colney hote hian semifinal an luh ngei rinawm mah se Chhingcows an hmachhawn hmasak ber dawn avangin semifinal ticket hi awlsam taka lak theih a la ni lo.

Chhinga Vengin point 20 an hmu tawh a, vanneih chuan tlinpui theih ni tawh mah se ngaih ṭha taka awm thei an la ni lo. Lalremruata leh Anand Gurung-a te enkawl team hian Mizoram Police, Electric Veng FC leh Aizawl FC te an hmachhawn dawn a, match hmasa pahnih hi a pawimawh zual ang.

Chhingcows hi Kolasib-ah Police nena an inkhel boruak a so sang a, hnehna an chang. November 14, Ningani tlaia an hmachhawn tur Police erawh Kolasib aiin an ṭha tawh zawk a, Lammualah inkhel nung tak hmuh tur a awm dawn.

MPL table thlir chuan point 20 hmu tling tawh Aizawl FC, Mizoram Police leh Chhinga Veng te an tlin mai a rinawm a, hmunruak pakhat hi point 15 hmu pahnih Electric Veng leh Chanmari ten an inchuh dawn niin a lang. MPL-ah hian head to head en a nih avangin round 14 thlenga an point a inang a nih chuan Lalsangzuala Hmar enkawl Electric Veng hi tling tur zawk an ni ang.

Electric Veng hian Ramhlun North, Chhinga Veng FC leh FC Venghnuai te an hmachhawn dawn. Chanmari hian Chawnpui FC, Aizawl FC leh Ramhlun North te an la inkhelhpui dawn bawk a, team pahnih inkarah fixture nei ṭha zawk hriatthiam a har hle. Hriat tel tura ṭha chu November 15, Zirtawpni zana Chanmari hmachhawn tur Chawnpui hian an match hnuhnung berah Electric Veng an hneh a, MPL a ngaihnawm phah hle.

I Day Football-a final thleng pha FC Venghnuai erawh season chawhnu lamah an ruh a no tih a lang. Chutihrualin Rindika Hmar hote tan hian semifinal kawng hi ping tawp a ni bik lo. MPL kai thar hian Aizawl FC, Chawnpui FC leh Electric Veng FC te an la hmachhawn dawn a, I League club laka point thum hmuh chu a hna hmasa a ni thei ang.

Table hnuai lama awm Ramhlun North leh Chawnpui FC tan semifinal sawi ngam a harsa tawh a, amaherawhchu club pahnih hian MPL khel zel turin result ṭha an mamawh. Ramhlun North hian an hnuaia awm Chawnpui hi tun season-ah vawi hnih an hneh tawh a, amaherawhchu coach thar Laldinthara hnuaiah Chawnpuiin Electric Veng an hneh. Tlak hlau pahnih hian him an tumna lamah semifinal khelh tum team-te point an la chhuahsak chhoh leh ngei pawh a rinawm hle.