Ramthar Veng tan zan chhinchhiahtlak: Davida'n Goliatha a hneh

Star Cement MPL13 a nung thar a, boruak siamtu chu team tenau Ramthar Veng FC an ni. Aizawl FC-in knockout stage an khelh theih loh avanga chauha beisei la nei MPL kai thar hian MPL13 semifinal first leg-ah champion lai leh Indian Football League club Chanmari FC 2-1 in an hneh. Coach Lalnunmawia hote an vannei lo a, an khelh ṭhat bakah ṭantu an nei ṭha a, inkhel erawh a la tawp lo.

October 26, Thawhṭanni zan dar 7:30 hian RG Stadium-ah second leg khelh a ni leh dawn a, Steven Dias-a leh a hote siruk laa rawn thawhchhuah an tum dawn. Tualchhung football ngainatute tan chuan hmaih phal chi a ni lo ang.

Davida vs Goliatha

Chanmari leh Ramthar Veng inkhelah hian tu zawk nge Davida tih zawh a ngai lo a, tualchhung football hre thiam pha chin chuan Davida leh Goliatha an thliar hrang thiam ang. MPL kaithar Ramthar Veng hian season liam ta khan First Division-ah club lian zawka ngaih Ramhlun North an barakhaih a, MPL qualifier-ah barakhaih nawnin Mizoram chhunga football inelna sang ber khel turin an tling.

MPL erawh club thar tan chuan beisei phak bakin a harsa ṭhin a, tawnhriat nei ṭha bik coach HC Zarzoliana ho pawhin lei rem an rap thei meuh lo. Relegate thei dinhmunahte an din hnuin assistant coach Lalnunmawia'n a ho a, Mawitea pui turin Ramthar Veng inkhelh thiam ṭhin leh NIS chhuak Jonathan-a'n assistant coach hna a chelh.

Season tawp lam match hnuhnung pathuma hnehna an chan zarah panganaah an invawrhchho a, an point hmuh hi semifinal khelh nan tawk pha lo mah se Aizawl FC an inhnuhdawh avangin an vannei. MPL inhamtan avanga lawm khan semifinal an khel a, champion beiseina hial an nei ta.

Chanmari erawh MPL-a ṭantirh aṭanga thawm nei lian an ni a, season tinin champion an tum ziah. MPL champion lai an nih bakah Indian Football League club an nih avangin player duh ang thlang thei an ni. MPL club enkawl turin AFC C Licence nei coach a tawk a, Chanmari coach Steven Dias erawh AFC Pro Licence coach a ni a, a licence aṭangin ISL club thlengin a enkawl thei vek.

Player thlan kawngah pawh Chanmari hian duh an thlang thei a, tualchhunga Mizo player ṭha an lakhawm. Hetah hian duhtawk mai loin ISL thlenga khel tawh Lalliansanga leh IFL khel tawh R. Ramdinthara te an la tel. Season ṭan hmain Chanmariin bia se, Ramthar Veng player zingah hnar thei an awm kher lo ang.

Mahse maw...

Football-ah engkim a thleng thei a, ball pet thiam vanga David Beckham of India ti hiala an sawi Steven Dias aiin Mizo coach Mawitea'n MPL a hrechiang zawk a, Ramhlun South tlangval hian player angin MPL nomawi a chawi tawh.

Chanmari lamin season liam taa champion puitu Rochhingpuia la kawl mah se an fapa rangkachak hian fapa an neih thar avangin first leg-ah hian technical area-ah a awm lo.

Ramthar Veng lamah tawnhriat nei ṭha bik MS Dawngliana, Malsawmzuala leh Lalremruata te an awm a, player dang lah hmabak nei eng leh talent nei ṭha rual an ni. Thufingin, "A lan dan aṭangin teh nghal ngawt suh," a tih ang deuh a ni a, a nihna takah chuan Davida leh Goliatha anga teh hi a dik lo!

Cho leh cho

Chanmari FC chak tura rinkai ni mah se Ramthar Vengin an hlau lo bik lo a, entu mipui thlir pawhin beiseina a awm. Tun hmaa ṭantu nei ṭha ṭhin Chanmariin chhiar tham lek ṭantu an nei a, Ramthar Veng ṭantu lam erawh ṭhahnem tak an ni a, an thawm a ring bawk.

Inkhelah pawh ṭan phat aṭangin an innawr tawn a, chance an inneih chhawk. Ramthar Veng lamin chance ṭha an ngah zawk mah a, MS Dawngliana telna a nih miau avangin an attacking pawh a mawi ṭhin hle.

Malsawmzuala'n chance ṭha a hlah a, Remruata pawhin a hun ṭha neih a khung thei lo - Chanmari keeper Zothanmawia a hna a tlin hle. Mahse, minute 34-naah player fing Dawngtea'n box chhungah ball ṭha bik a dah lut a, offside si lo a, Chanmari tlarhnung tlan peltu PC Ruatsanga'n goal hmahruai a khung.

Mahse, Ramthar Veng an fimkhur tawk lo. Corner kick-ah ven loa awm FC Lalhmunmawia'n chiang takin a tauh lut a, minute 40-naah 1-1 a ni. MPL-ah VAR hman a ni lo a, corner kick pettu Aron Vanlalrinchhana'n 'corner arc' pawnah ball a dah a, VAR hman ni ta se, corner kick hi pet ṭhat a ni ngei ang.

Bang rinawm John

First half-ah 1-1 a ni a, second half-ah Chanmari FC rawn insiamṭhain an goal bawh a na hle. Ramthar Veng tlarhnungin hna an ngah a, Aron-a'n chance ṭha hmasa a hlah hnuah Suanngaihmuana'n goal ngeina tura ngaihah a khung lo.

Ramthar Veng keeper John Lalruatfela a langsar a, Dinthar tlangval hian box pawn aṭanga Aron-a ball pet ṭha zet a dan hman phei chu ropui tak a ni. Chanmariin chance an ngah chho a, chutihrualin J. Lalbiakliana (Valpuia) ten CFC keeper T. Mawia tan hna an siam ve tho.

Chanmari substitute Vanlalpeka'n chance ṭha a insiam hnuah goal-ah a pet thei lo a, tawnhriat nei ṭha Dawngtea pawhin goalkeeper T. Mawia chauh a hmachhawn hnuah a khung bik lo.

Thil ropui chu

Minute 90-naah mual ding lam aṭangin Ramtharin an nawr a, Lalruatsaka Chhakchhuak cross chu Valpuia'n vawi khatah pet nghalin Chanmari defender FC-a ke a fuh hnuah goal kilah a lir lut.

Armed Veng South tlangval Valpuia'n chunglam a kawk a, a kut chu entlang anga siamin Ramthar Veng mipui awmna lam chu a thlir nghal. Goal a lut tlai a, Ramthar Vengin chakpui theih a ni tih an hria a, a tawp thlengin an ṭang tluan.

Central YMA Football 2004-ah Ramthar Veng an champion a, an hla pui chu, "Kan fak zel dawn," tih kha a ni a. Tun ṭumah pawh a danglam lo, RG Stadium-ah 'Lalpan thil ropui min tihsak e!' tiin khuang nen an zai rual a, hun duhawm bik an hmang.

Semifinal second leg khelh tur a la awm avangin Ramthar Veng tan tha thlah theih a la ni lo a, mah se Indian Football League club hneh turin an ṭha tawk tih an hria. Coach Mawitea chuan, "Entu mipui thlawpna ṭha tak khan team-ah phurna min pe a, Chanmari hi hneh ngei tumin RG Stadium kan pan. IFL club an nih avangin kan hlau lo a, kan theihna anga kan khelh chhuah chuan final kan lut thei tih kan hria," tiin Vanglaini a hrilh a, final lut turin beiseina an nei sang hle.