Arsenal insiksawi a ngai dawn

Premier League champion Arsenal chuan zanin dar 7:30 hian league match khel turin Everton an mikhual dawn a, Gunners-in tun hnaiah match leh hliam an ngah avangin Mikel Arteta tan squad siksawi thiam a ngai dawn.

London club hian Nilaini zan khan Champions League match-ah Bayern Munich lenchilhin, 2-2 in an inhnehtawk a, Germany-a zin chau Arsenal player tan Inrinni zana league match khelh lehnghal hi a hautak dawn tih a chiang.

Arteta-a'n tun season-ah captain Martin Ødegaard leh Declan Rice a hmang rim viau a, zaninah an chau lutuk tur ven nana Mikel Merino leh Martin Zubimendi te bul a ṭantir a nih pawhin a mak lo ang - Arsenal hian Thawhlehni zan dar 1:30-ah League Cup fourth round khel turin Fleetwood Town an lenchilh zui dawn!

Tun season-a khelhna hmun chang meuh lo Viktor Gyokeres hian tun hnaia khel ṭha lo Kai Havertz aia bul ṭan a chak ve tawh ang tih a chiang a, Myles Lewis-Skelly leh Cristhian Mosquera te pawh starting XI-ah lo kir mah se, a awm lo hran lo ang.

He thu buatsaih a nih lai hian Bayern Munich laka inhliam Bukayo Saka dinhmun a la chiang lo a, Arteta-a'n a dinhmun a ṭhat loh thu a sawi avangin English forward hi zaninah chuan a lo kir rih lo ang tih erawh a chiang.

International break-a inhliam, Greece forward Christos Tzolis-a'n dam lam pan tawh mah se, zanin inkhel hi a tan chuan a la hma hretin a rinawm a, November thlatir velah a lo kir a beiseiawm ber zawk.

Piero Hincapie-a'n training a neih leh tawh avangin zaninah chhawr theih a nih a rinawm a, hetihrual hian Arteta-a'n League Cup atana khek a thlang zawk a nih pawhin a awm lo hran lo ang.