Brighton hi Barca ang an ni - Iraola

Liverpool chuan Pathhianni zan dar 7:30 hian Premier League match khel turin Brighton & Hove Albion an mikhual dawn a, Reds coach Andoni Iraola chuan Brighton chu Barcelona ang mai an nih thu a sawi - game awlsam a beisei lo.

Iraola chuan, "Brighton hian season duhawm tak an hmang a, an phur vanglai tak a ni tih pawh ka hria. Villarreal nen pawh an khelh dan a inang deuh a, Barcelona ang maia khel ṭhin an ni.

"Villarreal nena kan inkhel kha Brighton nena kan inkhel tur atan inpuahchahna ṭha tak a ni a, kha game aṭang khan thil tam tak kan zir," a ti a, Brighton chu team ṭha tak ni mah se, Pathianni zana hmachhawn tura an inbuatsaih ṭhat thu a sawi.

Brighton hian season duhawm tak an hmang mek - tun season EPL match sarih khelh tawhah vawi nga chak tawhin, vawi khat an tlawm a, vawi khat draw an nei. EPL table-ah pathumna an ni mek a, goal 23 zet an khung tawh! Tun season EPL-ah anni aia goal khung hnem an awm lo.

Mahse, Brighton hian Ningani zan khan Europa Conference League khelin, khualmualah Czech club Jablonec an lenchilh a, 0-0 in an inhnehtawk - an chau dawn tih a chiang bawk.

Liverpool-in tun season-ah beisei phak lo mah se, Manchester City laka an tlawm hnuah, inelna hrang hrangah match thum a zawnin an chak leh tawh a, Anfield-a inkhel tur an nih bawk avangin an inringtawk khawp ang.

Iraola-a'n Liverpool a enkawl tirhin squad siksawi thiam a pawimawh thu a sawi a, a thusawiah a ding nghet - match sarih zet chu a zawnin player pathum aia tam starting XI-ah a thlak danglam tawh a, Villarreal laka 4-3 a an chak ṭum pawh khan player paruk ngawt bul ṭantu a thlak danglam.

Spanish club lakah khan Florian Wirtz, Bradley Barcola leh Alexander Isak te pawh bench lamah hun a hmantir a, Ronald Araujo leh Jeremy Jacquet te a la chhuak bawk - Pathianni zanah pawh 'fresh' takin Brighton an hmachhawn thei ang.