Haaland a dam tawh

Manchester City striker chhuanvawr Erling Haaland chuan hliam tenau nei ve mah se, coach Enzo Maresca chuan a player hi 100% a a dam chian tawh thu a sawi a, vawiin tlai dar 5:00-a Aston Villa an lenchilh hunah pawh a inlan thei ang.

City hian Thawhlehni zan khan Champions League inkhelah AEK Athens chu 5-1 in an sawp a, he inkhelah hian Haaland bakah Nico O’Reilly, Mateo Kovacic leh Matheus Nunes te chu hliam vangin an inlan thei lo bawk.

Maresca chuan, "Ka sawi duh chu, ka player inhliamten dam lam an pan a, hma an sawn. Mahse, 100% a Villa hmachhawn thei tur chu Haaland chiah a ni rih a, O’Reilly, Kovacic leh Nunes te dinhmun chu la thlithlai leh tur a ni," a ti.

Kum 26 mi Haaland hian tun season inelna hrang hrangah match 10 khel tawhin, goal 12 a khung leh der tawh a, team ṭha Villa laka a chhawr thei tur hi Maresca pawh a phur khawp ang - City hian tun season league match sarih an khelh tawhah hnehna an la chang vek a, EPL-ah hmahruaitu an ni mek.

Maresca chuan, "Kan bul ṭan danah kan lawm a, mahse, chak zel kan duh. Kan tun dinhmunah kan lawm a, mahse, hetah hian duhtawk kan tum lo. Match sarih chauh a la ni a, nomawi sawi nan pawh a la hma a ni," a ti.

City hmachhawn tur Villa hian beisei angin season bul ṭan lo mah se, an league match hnuhnung pathumah point sarih an hmu a, UCL match thum khelh tawhah an la chak vek bawk.

Maresca chuan, "Unai hi coach ṭha tak a ni a, ka zah em em bawk. A club enkawl apiangah a hlawhtling zel a, Villa pawh hi an ṭha hle. An boruak ṭhat vanglai tak a ni bawk a, a awlsam dawn lo tih ka hria a ni," a ti a, Villa hneh a awlsam dawn lo tih a sawi.