Odisha khelmualah Highlander

India rama club football inelna sang ber, Indian Super League pawh khelh chhunzawm zel a ni a, zanin dar 7:30 hian Odisha chuan NorthEast United an mikhual dawn - Highlander hian season bul an ṭan ṭha hle.

NorthEast United hian an match hmasa berah rin loh taka Mohun Bagan an hneh hnuah, Kerala Blasters chu 4-1 in an sawp leh a, an inrintawk vanglai tak a ni - he team-ah hian Mark Zothanpuia leh Lalrinzuala te chu Mizo player awm an ni.

Odisha-ah hian K. Lalṭhathanga (Puitea) chu player pawimawh niin, Vanlalzuidika Chhakchhuak leh K. Lalrinfela ten hmun pawimawh an chang ṭhin bawk a, zanin inkhel tur hi en a chakawm ta hle.

Pathianni tlai dar 5:00-ah kai thar Churchill Brothers chuan Punjab FC an mikhual dawn a, zan dar 7:30-ah Kerala Blasters-in Mumbai City an mikhual bawk ang.

Blasters tan Freddy Lallawmawma'n hmun pawimawh a chang a, hetihrual hian Ashley Westwood-a enkawl team hi NorthEast United laka mualpho hlim an nih avangin insiamṭhat an mamawh hle - UAE sumdawng hausa ten an lei thar club hi result ṭha nei turin an beisei ang.

Mumbai City-in an inrelbawlna an siksawi hnuah beisei an la phak lo a, league match hnih aṭangin point khat chiah an la nei - Hmingthanmawia Ralte (Valpuia) chu player pawimawh a ni a, Zothanpuia leh Lalnuntluanga Bawitlung ten hmun pawimawh an chang bawk.