Bournemouth-in Amorim-a enkawl Milan an hneh

Premier League club AFC Bournemouth chuan Ningani zan khan Europa League-ah Ruben Amorim-a kaihhruai AC Milan chu 3-0 in an hneh a, Europe inelnaa an vawi khat telnaah match thum khel tawhin an la chak vek.

Bournemouth tan Justin Kluivert, Marcus Tavernier leh Amine Adli ten goal khat ṭheuh an khung a, Milan-in an mualpho khuhna tur pawhin goal an khung ve thei lo.

Vitality Stadium-a inkhelah mual neituin bul an ṭan ṭha zawk a, Milan tlarhnung an rum ṭhaih nghal. Minute riatna lekah Milan defender Koni De Winter handball vangin penalty an hlawh chhuak a, Kluivert-a'n khungin a team hma a hruaipui.

Milan an insiamrem hmain keeper Mike Maignan a insum zo lo a, Cherries midfielder Tyler Adams chu a chiang takin a nam tlu a, match referee Vasilios Fotias-a'n red card a phawrh bakah penalty an chawi nawn.

Cherries tan penalty pet turin Tavernier a pen chhuak a, English midfielder hian an hmahruaina belhchhah nan a khung a, Omari Hutchinson thlaktu rawlthar keeper Lorenzo Torriani-a'n a dang thei lo.

Goal hnih an chhuah bakah kim loa an khelh avangin Milan tan thawh chhuah a harsa tawh a, a bet zawkah an ṭang tluan. Minute 84-naah Adli-a'n freekick aṭangin an chak nemnghehna goal a khung a, khualmualah Milan an mualpho.

Bournemouth manager Marco Rose chuan, "Bul kan ṭan ṭha a, red card phawrh a nih hma pawh khan kan khel ṭha zawk. A tam zawk kan nih hnuah pawh kan inthlahdah lo a, an khelh dan avangin ka naute ka chhuang takzet," a ti.

October 25, Pathianni zan dar 7:30 hian Cherries hian Manchester United an hmachhawn dawn a, inrintawkna an ngah sawt ang. Chutihrualin Old Trafford-a khel tur an nih avangin an zuam a thiang lo thung.