Nuam ti taka tlan ka tum - Antonelli

Pathianni zan United States Grand Prix awm turah Andrea Kimi Antonelli chuan nuam ti taka tlan a tum bakah, a rilruah champion a lan loh thu a sawi a, US GP-ah Italian driver-ah mipui mit a fu dawn.

Kum 20 mi Antonelli chuan, "US-ah champion ka nih theih nan midang an chet chhiat a ngai a, kei chuan chu chu ka duh lo. Intlansiak hlimawm leh nuam tak hmachhawn ka duh a, midang an chet chhiat bik ka duh lo a, a thlen ka ring lo bawk.

Mahse eng thil pawh thleng thei a ni a, kan 'race engineer' Peter Bonnington nen pawh kan inbia a, season tawp thlengin ka hmabak intlansiak bak engmah ka ngaihtuah dawn loh bakah nuam ti taka tlan ka duh a ni," a ti.

Tun season-ah Antonelli a che ṭha a, point 340 hmuin drivers table-ah hmahruaitu a ni mek a, constructors table pakhatnaa Mercedes an awm theih nan a teammate George Russell nen an thawh hlawk hle.

Hetihlai hian Antonelli hian Circuit of the Americas-ah champion theih dan a nei a, mahse hnehna a chan bakah Silver Arrows (Mercedes) driver pakhat zawk Russell leh Ferrari driver Lewis Hamilton ten point an hmuh tam a thiang lo.

Antonelli hian a rilruah champion a lan loh thu sawi mah se, driver pahnihte hi an chet ṭhat tawk loh chuan intlansiak paruk hmabakah a champion thei. Chutihrualin Antonelli el turin Charles Leclerc leh champion lai Lando Norris te an la awm a, tun hnaiah Max Verstappen-a'n hma a sawn avangin Italian driver tan a awlsam dawn lo.