Malen-a'n Napoli hmachhawn dawn

AS Roma forward Donyell Malen chuan red card a hmuh avanga a hremna hmang zoin, zanin dar 9:30-a Napoli an tlawh hunah a khel thei tawh dawn a, Dutch forward lo kir avangin Roma an ṭha leh sawt dawn.

Kum 27 mi Malen hian kumin January khan loan-in Roma hi a zawm a, season chanve chawhnu lam chauh khel mah se goal 14 a khung hman a, goal 17 khungtu Lautaro Martinez chiah a tluk lo.

Roma-in a nghetin Malen an la zui a, tun season-ah pawh Malen hian Serie A-ah match ruk aṭangin goal ruk a khung leh der tawh. Frosinone forward Antonio Raimondo chiah tluk loin Paulo Dybala nen an inkawp fuh takzet a, Napoli tan ven bik a sual lo ang.

Hetihlai hian Napoli tan Scott McTominay a lo kir leh tawh a, a lung an zai hnuah McTominay hian a dam leh tawh tih lantirin Bodo/Glimt an hneh ṭumin goal hnih a khung.

Napoli hian Scottish midfielder bakah goal thum khung tawh Kevin De Bruyne an nei a, tlarhmaah Manchester United forward Rasmus Hojlund a awm bawk avangin inkhel hmuhnawm a beisei ngam.