Dembele tel loa khel tur PSG

French champion Paris St-Germain chuan Pathianni zan dar 1:15 hian Lyon an mikhual dawn a, Barcelona laka inhliam Ousmane Dembele chu kar thum bawr vel a chawlh a ngaih avangin khel ve thei dawn lo.

Thawhlehni zana Catalan club nen Champions League-a an inhmachhawn ṭumin Dembele hian a malpui vei lama tina a, minute 19-naah lak chhuah niin Ferran Torres-a'n a thlak.

Dembele hliam hi endik a nih hnuah Lyon a hmachhawn thei dawn lo tih nemngheh a ni a, PSG hian hnehna an chang a nih chuan hmahruaitu an nih theih dawn avangin Dembele awm lo tur hi channa nasa tak a tling.

French forward bakah hian Khvicha Kvaratskhelia a inhliam bawk a, Georgian forward phei hi chu ACL a nih avangin tun season-ah a lo kir leh a rinawm tawh loh zawk.

PSG hian tun season bul an ṭan ṭha tawk lo a, Luis Enrique dinhmun a nghing hman hial. Mahse an tlu reng lo a, Ligue 1 leh UCL champion lai an nih chhan an tilang leh thei tawh.

Point hmuh zat inangah Lyon hi goal difference vangin an pha lo a, Enrique leh a nauten hmahruai theihna hun ṭha hi bawhpelh an duh dawn lo. Dembele leh Kvaratskhelia te awm dawn lo mah se Desire Doue, Mika Godts leh Torres te an la awm avangin hlauthawng lutuk tur an ni bik lo.