Man United 3 - 1 Brighton & Hove

Pathianni zan khan Manchester United-in Old Trafford-ah Brighton & Hove Albion 3-1 in an hneh a, Ole Gunnar Solskjaer chuan, "Tun season-a kan khelh ṭhat ber ṭum a ni," tiin inkhelh banah a sawi.

United hian match 12-ah point 16 hmuin pasarihnaah an awm a, an chung chiaha awm Arsenal point khatin an pha lo. Inkhel dangah Wolverhampton Wanderers-in West Midlands derby-ah Aston Villa 2-1 in an hneh a, Nuno Espirito Santo hote hian United point hmuh zat ang chiah an hmu bawk.

Old Trafford-ah goal a lut hma, United-in minute 17-na lekah Andreas Pereira hmangin an khung. Brazilian midfielder Pereira ball pet hi Brighton player-in a khawih kawi avangin keeper Mat Ryan tan dan ngaihna a awm lo. Minute hnih hnuah mualneituin goal hnihna an khung a, Harry Maguire leh Scott McTominay te thawh ṭhat vangin Davy Propper-a'n an lamah a tilut.

Minute 64-naah Brighton defender Lewis Dunk-a tauh luh hmangin mikhualin beiseina thar an nei a, amaherawhchu khelmuala che ṭha zawk United-in Marcus Rashford-a'n minute hnih hnuah chak nemnghehna goal a khung.

United tan Brighton laka 3-1 hrim hrim hi result ṭha bik tiha sawi tur a ni lo a, an khelh dan erawh ṭum dang zawng aiin a ṭha. Mualneitu hian vawi 21 zet goal attempt an nei a, chung zinga vawi 11 chu goal zawnah a kal. Rashford-a'n Anthony Martial thawhrah seng mah se United-in goal an khung tlem chhanah a ngaih theih. English forward hian Daniel James cross ṭha tak chu goal ruakah a khung lo a, ṭhiante pe mai loa ama tih a tum vangin chance ṭha a hlah hnem bawk.

Brighton keeper Matt Ryan a khel ṭha a, James leh Martial goal khung tur a dang ṭha hle. United boss Solskjaer chuan, "Kan khelh dan a hmuhnawm a, a hlimawm tel bawk. Goal nga aṭanga goal sarih kan khung lo kha chu a mak a ni," tiin goal tam zawk khung an phu thu a sawi.

United midfielder Scott McTominay chu hun tawpah inhliam vangin lakchhuah a ni a, Scotland-in Euro qualifier-a Cyprus leh Kazakhstan an khelh hunah a inlan thei lo ang. Solskjaer chuan, "Scott-a inhliam dan ang khan hliam ka nei tawh a, kar hnih lek a nih theih rualin kar riat thleng pawh a ni thei. Scan neih hma chu thu chiang a awm thei lo," tiin a sawi.

United tana chanchin lawmawm erawh Ashley Young hrem vanga lut Brandon Williams a khel ṭha a, kum 19 mi United academy chhuak hian standing ovation a dawng hial. Solskjaer-a'n player naupang zawk chungah rinna a nghat a, Brighton lakah hian an kum chawhrual chu kum 23 leh ni 350 a ni.

Tun season aṭangin Premier League-ah VAR hman ṭan a ni a, tunlai thiamna sang tak hi a hman dan fuh tawk loh vangin sawiseltu an tam. United forward Martial-a ball petin Brighton player kut a per avangin penalty hmu tura ngaih an ni a, VAR hman a ni lo. Solskjaer hote hi an chak chian avangin VAR chungchang an sawi zui lo, amaherawhchu tun hnaia thil thleng dangte thlir tel chuan VAR hman dan hi ennawn ngei a ṭul ang.