Thiem lakah Federer a chak lo

Mipa tennis thiam zual pariat inelna ATP Finals-ah Roger Federer chuan bul ṭan fuh loin Dominic Thiem a hneh lo. Pathianni zan khan world number 2 Novak Djokovic erawhin hnehna nen bul a ṭan thung.

O2 Arena, London-a group match inkhelah world number 3 Federer hi seeded pangana Thiem lakah 7-5, 7-5 in a chak lo. Swiss star hian a service hmasa ber a hloh nghal a, game nga ve ve thlengin in tluk chho mah se hun pawimawhah Austrian tlangval zawk a che fuh.

Set hnihnaah pawh Thiem bawk a che fuh zawkah a ṭang leh a, tun hnai an intawn vawi thumah Federer a chak lo vek - vawi sarih an inkhelh tawhah Grand Slam vawi 20 champion tawh Federer hi vawi hnih chauh a la chak ve a ni.

Thiem chuan, "Stadium ropui takah player ṭha bik nen kan inkhel a ni a, point inhnaih taka kan awm laiin a vannei zawkah ka ṭang. Tennis legend lakah hnehna ka chang a, ka tan chuan a hlu takzet. Match hmasa bera hnehna chan vangin hna ka zo tihna erawh a ni lo," tiin a sawi.

Inkhel dangah Djokovic chuan Matteo Berrettini chu 6-2, 6-1 in a hneh nghal. Tun season Australian Open leh Wimbledon champion hian hnehna chang turin harsatna a nei lo. Djokovic chuan, "A vawi khat nan World Tour Finals a khel ve chauh a ni a, a awlsam lo ve bawk a ni," tiin Berrettini chungchang a sawi.

Serbian tlangval hian zanin dar 1:30-ah a group match hnihna atan Federer a hmachhawn leh dawn. World number 1 ni chunga season khar a duh a nih chuan final a luh ngei a ngai dawn a, a tan chetsual a thiang lo tihna a ni ang.