Wolves leh Abraham inhnaih

Premier League club Wolves chuan Chelsea striker Tammy Abraham chu tun thlasik bazar chhungin lakluh ngei an tum a, an inhnimhnai tawh hle.

Kum 21 mi Abraham hi loan hmangin Championship club Aston Villa tan a khel mek a, season kal laiah goal 16 khung tawhin, a kum la tam lo mah se season liam ta khan Swansea tan Premier League-ah goal nga a khung tawh bawk avangin a tawnhriat hi Wolves tan chuan a itawm tham hle.

Chelsea hian an player tam tak chu loan hmangin an chhuah tir mek a, heng zinga pakhat Abraham pawh hi an kawl chhunzawm duh dawn em tih a chiang lo. Youth player a nih laia an lakluh hi senior team tan a la khel miah lo.

Villa hian an striker hawh lai hi an duh chuan a nghetin an la thei, mahse manager Dean Smith chuan Abraham thlak nan hian Jonathan Kodjia leh Scott Hogan te a la neih thu a sawi tawh avangin an la nghet dawn lo tih a chiang. Wolves hian mumal takin indawrna la kalpui lo mah se an ngaihven zia an lantir tawh avangin an chang thei tura ngaih a ni.