Golden State dan zawh loh Harden

James Harden chuan NBA regular season a khelh laia a match hnuhnung pangaah a zawnin point 40 a score tling vek a, nimin zing inkhel inhnehtawk takah Houston Rockets chu Golden State Warriors lakah 135-134 in hnehna a chanpui.

Oracle Arena-a inkhelah team pahnih an inkhel tawk hle a, hun pangngaiah chak zawk an awm loh avangin Over Time khelh a ni. OT a zawh hma second 2.7 chauh a awm tawh tihin Harden-a'n 3-points vawm lutin hnehna an chan theih phah a ni.

Golden State lakah Har­den hian point 44 a neih bakah assist vawi 15 neiin rebounds ṭum 10 a la bawk, Most Valuable Player ni lai hian Western Conference lama an elpui lakah zahngaihna a lantir lo chiang hle.

Kum 29 mi Harden chuan, "Point neih tumin ka shot ṭhin a, ka ball vawm kha basket-ah a luh ṭhin avangin ka vannei. Inrintawkna kan nei sang leh tawh a, hei hian result ṭha a hlawh chhuak a ni," a ti. Rockets hian season bul ṭan fuh lo mah se an insiamṭha tawh a, a zawnin match ruk an chak leh tawh a ni.

Season hmasa khan Warriors leh Rockets te hi an inel tawk hle a, Western Conference final-ah pawh game sarih an khelh hnuah Golden State chakin NBA nomawi an chawi zui thei bawk - kuminah pawh an inel na leh hle tura ngaih a ni.