Tata Open: India beiseina Bopanna leh Sharan

Tata 'Maharashtra' Open-ah doubles seeded number 1 Rohan Bopanna leh Divij Sharan te chuan semifinal lut turin Ningani khan Leander Paes leh Miguel Angel Reyes-Varela te inkawp chu 6-7(4), 6-4, 17-15 in an hneh hram a, Paes leh a kawppui hian match point vawi ruk an hmang ṭangkai thei lo.

Nizan khan Bopanna leh Sharan hian Ivan Dodig leh Simone Bolelli inkawp an hmachhawn a, result kan hre hman lo. Hnehna an chang a nih chuan British pair Luke Bambridge leh Johnny O'Mara te inkawp nen nomawi an inchuh ang.

Inelna ngaihven hlawh zawk men's singles-ah nikum finalist Kevin Anderson chuan semifinal lut turin harsatna a tawk lo a, quarterfinal-ah seeded number 7 Jaume Munar chu 6-3, 6-3 in an hneh. South African tennis star Anderson hian nizan khan champion lai leh seeded number 3 Gilles Simon nen Centre Court-ah final khel tur an zawng.

Men's singles semifinal pakhat zawkah Steve Darcis leh Ivo Karlovic te an inkhel a, anni pahnih hi seeded an ni pha lo ve ve. Maharashtra Open hi kum 1997-2017 inkar khan Chennai-ah khelh niin Chennai Open tih ṭhin a ni. Nikum khan inelna hi Pune-ah khelh ṭan a ni a, singles bikah Simon chu a champion hmasa ber.