Sharapova dinhmun a chiang lo

Maria Sharapova chu nimin khan Shenzhen Open quarterfinal khelh lai aṭangin a inhnukdawk a, malpui hliam vanga inkhel tluan thei lo Sharapova hi January 14 aṭanga khelh tur Australian Open atan a dinhmun a chiang lo zui nghal.

World number 1 hlui Sharapova hian Aryna Sabalenka lakah set hmasa zawk chu 6-1 in a hloh a, set hnuhnung zawkah pawh 4-2 a hnufual lehin; a hliam vangin a khel chhunzawm thei ta lo a ni.

Sharapova-i coach Tho­mas Hogs­tedt chuan, "Medical time out lak hnuah pawh ṭhat lam a pan thei lo, hliam na zual zawk a tawrh hmain a inkhelh chhunzawm rih loh kha a ṭha," tiin a player chungchang a sawi.

Russian nula hian Grand Slam nomawi panga a chawi tawh a, nomawi lian a lak zingah Australian Open (2008) pawh a tel. Mahse, damdawi hman phal loh a hmang tih hmuhchhuah a ni a, thla 15 hrem a nih hnuah rawn kir leh tawh mah se Tianjin Open-ah bak a la champion leh thei rih lo a ni.