Odisha-in NorthEast an chelh

Inrinni zan Indian Super League inkhelah Odisha chuan match hnih khelh tawha la chak ve ve NorthEast United an mikhual a, goal an chhuah lo - team pahnih hi 0-0 in an inhnehtawk a, Odisha defender Jeremy Zohminghlua chu player of the match atan thlan a ni.

Highlander tan Alaaeddine Ajaraie chuan chakna goal khungna hun ṭha a nei a, mahse, Stephen Eze handball vanga an penalty hlawhchhuah chu Moroccan striker hian goal-ah a chantir thei lo!

Odisha tan Jeremy bakah K. Lalṭhathanga (Puitea), Vanlalzuidika Chhakchhuak leh K. Lalrinfela ten inkhel bul an ṭan a, Highlander tan Mizo inlan an awm lo thung.

Zirtawpni zan ISL inkhelah East Bengal chuan 5-1 ngawtin Inter Kashi an sawp bawk a, Kolkata club tan Ake Arnaud Loba chuan goal hnih khungin, Dani Ramirez, PV Vishnu leh Lukasz Zwolinski ten goal khat ṭheuh an khung.

Inter Kashi goal awmchhun hi East Bengal defender Lalchungnunga'n an lama a tihluh palh a ni a, inkhel result a thlak danglam phak lo - Kolkata club tan David Lalhlansanga chu bench aṭangin a lut a, Inter Kashi tan Laldinliana Renthlei chuan bul a ṭan bawk.

East Bengal hian Thawhlehni zanah AFC Champions League Two an khel dawn a, player ṭhenkhat hahdamtir niin, Edmund Lalrindika pawh bench lamah a awm tluan.