Napoli leh Roma an inhnehtawk

Inrinni zan Serie A inkhelah Napoli leh AS Roma ten inkhel hmuhnawm an chhawp chhuak a, goal ropui bakah red card thlenga hmuh tur awm vekin 3-3 in an inhnehtawk.

Napoli tan Andre-Frank Zambo Anguissa-a'n goal ropui a khung bakah, Scott McTominay-a'n goal hnih a khung a, Roma tan Leonardo Balerdi-a'n goal hnih khung vein Matias Soule chuan goal khat a thawh ve bawk.

Napoli an ṭha

Stadio Diego Armando Maradona-a inkhelah Napoli tan Anguissa-a'n Matteo Politano free kick pet kal zel aṭangin goal kilah tak a volley goal lut a, Roma keeper Pierluigi Gollini-a'n a en liam.

Hma an hruai hnuah Napoli an hlauhawm chhunzawm a, Mathías Olivera pet chu Gollini-a'n a dan pet hnuah Marten de Roon-a'n a pet chhuak hman a, first half-ah goal dang a lut tawh lo a, Roma an him hlauh.

Second half-ah Napoli bawk an langsar a, minute 48-naah McTominay-a'n an hmahruaina belhchhahin a tauh goal a, tun season-a hneh loh la tawng lo Roma an tlawm dawnin a lang hman.

Roma nge nge

Mahse Roma insiamṭha vatin minute 69-naah Soule-a'n mawi takin an siphurh a sut ṭhen a, Roma an phur thar. Minute nga hnu lawkah Balerdi-a'n chiang zeta pet goal-in an siphurh a sut zo.

Roma phur viau mah se McTominay a inthlahdah lo a, Scottish midfielder hian box pawn aṭangin tawih zetin a pet lut a, an chakna goal erawh a ni lo. Minute 89-naah Roma tan Balerdi-a'n kawh taka tauh lutin an siphurh a sut nawn.

Goal an chhuah laia Napoli defender Sam Beukema hliam vanga inkhel tihtawp a nih loh avangin coach Massimiliano Allegri a lawm lo a, a lungawi lohna uchuak taka a lantir avangin hun tawp hma hretin red card a hmu.