Booker hoin Suns-in Warriors hneh

Phoenix Suns chuan NBA season thar atana a vawi khat nan, nimin zing khan Golden State Warriors chu 131-122 in an hneh a, Devin Booker chuan point 43 zet score-in ani aia score hnem an awm lo - rebound vawi sarih lain assist pasarih a nei bawk.

PHX Arena-a inkhelah Warriors-in bul an ṭan ṭha zawk a, mahse Booker leh Dillon Brooks te an chet ṭhat avangin an 22-25 chauhin Warriors-in hma an hruai.

Second quarter-ah erawh Warriors hian point 29 score mah se, Suns-in 35 zet an score thei a, 57-54 a lehthalin an hawikir tawh lo. Third quarter-ah Suns an che ṭha lehzual a, Booker-a'n amah chauhin point 17 a thawk chhuak.

Kum 29 mi Booker bakah hian Miles Bridges, Jalen Green, Luke Kennard leh Collin Gillespie te an chet ṭha a, Warriors-in point 38 score mah se 45 score-in an inthlauhna an tizau zel.

Fourth quarter-ah Warriors-in theihtawp chhuahin lehthal tum mah se Suns chet ṭhat zan an tawng a, point 30 score leh mah se Booker leh a ṭhiante kut kal lai a tawp loh avangin a tlawm zawkah an ṭang.

Warriors hian an thiampuipa Stephen Curry chu a khup ding lamah hliam a neih avangin an chhawr thei lo a, Yaxel Lendeborg, Brandon Williams leh De'Anthony Melton te che chhe lo mah se Curry tel loin an ṭha tawk lo.

Kum 28 mi Curry bakah hian Gui Santos, Brandin Podziemski, Al Horford, Draymond Green, Charles Bassey, Kristaps Porzingis, Moses Moody leh Jimmy Butler te an chhawr thei lo a, inhliam zinga a tam zawk hi player tawnhriat ngah an nih avangin result ṭha an neih dawn chuan an dam vat a ngai ang.