Asian Cup 2019 A hun a thleng ta - Pathianni zanah India

Asia khawmualpuia ram leh ram football hmanga an inelna sang ber Asian Cup chu zanin dar 9:30 hian khelh ṭan a ni dawn ta a, inelna thlengtu United Arab Emirates leh Bahrain an inkhel ang. 

Kum 2011 hnua a vawi khat nan India chu Asian Cup-ah hian an inlan dawn a, Pathianni zan dar 6:00-ah an match hmasa ber khelin Thailand nen an inkhel dawn. Inkhel hi Star Sports-ah a en theih dawn a, online-a en duh tan Hotstar lamah en theih a ni dawn bawk. 

Asian footballer ṭha rual zingah Mizo tlangval pakhat a tel dawn a, Jeje Lalpekhlua chu India jersey ha chungin a inlan dawn - Sunil Chhetri nen tlarhmaah an inkawp ang. 

India hi Group A-ah inelna thlengtu UAE, Thailand leh Bahrain te nen an awm ho a, draw neih a nih ṭumin team langsar tak tak Australia, South Korea, Iran, Saudi Arabia leh Japan an pumpelh avangin an vannei tia sawi theih a ni. 

Blue Tigers hian Pathianni zana an match hmasa ber an khelh hnuah January 10 khian United Arab Emirates nen an inkhel leh ang a, January 14-ah Bahrain an hmachhawn leh ang. 

FIFA ranking aṭanga teh chuan Group A-ah hian 79-na UAE chu a sang ber an ni a, India chu 97-na niin Bahrain (113) leh Thailand (118) ten an dawt a, mahse player neih dan enin team hi ranking aṭang ngawta teh chi a ni lo ang. 

Blue Tigers hian Asian Cup hi vawi thum an lo khel ve tawh a, kum 1964, 1984 leh 2011 te khan an inlan. Kum 1964-ah hian India hi pahnihna niin Asian Cup-a an thlen san ber a la ni reng a, 1984 leh 2011-ah erawh group stage aṭangin an tla.

Asian Cup-a an inlan hnuhnung ber 2011-ah khan India an vanduai a, Australia, South Korea leh Bahrain te nen group khatah awm hoin chak an nei miah lo a, point hmu loin an haw. 

Match thum an khelhah goal 13 ngawt chhuahin goal thum chiah an khung a, goal hnih hi Sunil Chhetri khung a ni - India captain hi UAE-a inlan tur India squad-ah Asian Cup khel tawh awmchhun a ni. 

February 1-a final khelh tur Asian Cup-ah hian team 24 an tel a, India tan knockout round luh beiseina a awm em, tih chu zawhna awm a ni a, an group awmna hi India tan chuan beisei san theihna bera ngaih a ni. 

Team 24 hi group parukah ṭhen hran niin group tinah team pali zel an awm a, group tin aṭangin a sang pahnih chu last 16 lut chiang tur an ni a, pathumna zinga a ti ṭha paliin an zawm ve bawk ang. 

India hian match thum khelh tur an neih aṭangin point li chauh an hmu a nih pawhin last 16 luh beiseina a awm thei dawn tihna a ni a, vawi khat chakah pawh beiseina a awm ang - UAE, Thailand leh Bahrain te hi khelh ṭhat ni chuan hneh theih tur vek an ni.

India coach Stephen Constantine-a'n 4-4-2 a hmang nasa a, tlarhmaah Sunil Chhetri leh Jeje Lalpekhlua an inkawp rin a ni. Hnahthial tlangval Jeje chuan, "Sunil Chhetri nen hian India tana ka match hmasa ber ka khelh aṭangin kan inkawp ṭan a, inhriatthiamna ril tak kan nei a, kan awmna lai hi kan hre chat chat thei a ni," 

tiin a sawi.

Midfield laiah Pronay Halder leh Vinit Rai emaw Anirudh Thapa te chu inkawp ngei tura ngaih an ni a, mual sirah Udanta Singh leh Halicharan Narzary te tlan chakna chu an innghahna tur a ni leh ang. 

Chuh phak rual lohin Gurpreet Singh Sandhu chuan si ban a nghah leh ngei a rinawm a, right back-ah Pritam Kotal awmin Subhasish Bose chu left back-ah chhawr a ni ang a, a laiah Kerala Blasters defender pahnih Sandesh Jhingan leh Anas Edathodika an inkawp rin a ni. 

War Elephants tia hminglem an pek Thailand hi Ghana leh Algeria coach hlui Milovan Rajevac enkawlna hnuaiah an khel a, Serbian coach hian match 20 a enkawl tawhah vawi riat hnehna chanpuiin vawi ruk an tlawm.

India tana thu hriat nuam tak tur chu Thailand hian India-in goal khung loa Oman an inhnehtawkpui hnu lawkah Oman hi an hmachhawn ve leh a, 0-2 in an tlawm. Blue Tigers-in last 16 luh an beisei dawn a nih chuan Thailand hi point thum hmuh tuma an khelhna tur an ni. 

Thawnthu hlui keu let erawh chuan India aiin Thailand an chungnung zawk. Vawi 21 an inhmachhawn tawhah Thailand-in vawi 11 hnehna an chan laiin India erawh vawi li chiah an chak a, goal 21 an khung laiin Thailand lamin goal 36 an khung thung.

India tan ṭum dang ang bawkin Chhetri chu tlarhmaah innghahna a ni leh dawn a, Jeje Lalpekhlua sawi hmaih a thiang lo ang - India tana koh player 23 zingah Chhetri hi ram tana inlan hnem ber niin match 104-ah goal 65 a khung a, Jeje chu pahnihna niin match 53-ah goal 22 a khung. 

Blue Tigers tlarhnung tan Manchester City leh Almeria forward hlui Teerasil Dangda chu buaipui ber tur a ni dawn - J League club Sanfrecce Hiroshima tana khel mektu hian ram tan match 95-ah goal 42 a khung thei. 

Japanese club Vissel Kobe lama Lukas Podolski leh Andres Iniesta te nena khel ho Theerathon Bunmathan hi tlarhnungah a ṭangkai leh dawn tih a chiang a, Thailand Player of the Year ni lai leh J League Best XI (2018)-a tel phak attacking midfielder Chanathip Songkrasin hi ngaihthah atan chuan a ṭha mah mah ang.

UAE    9:30 PM    Bahrain

January 6, Pathianni

Australia    4:30 PM    Jordan

Thailand    7:00 PM    India

Syria    9:30 PM    Palestine

Goalkeepers: Gurpreet Singh Sandhu (Bengaluru), Amrinder Singh (Mumbai City), Vishal Kaith (Pune City).

Defenders: Pritam Kotal (ATK), Sarthak Golui (Pune City), Sandesh Jhingan (Kerala Blasters), Anas Edathodika (Kerala Blasters), Salam Ranjan Singh (East Bengal), Subhasish Bose (Mumbai City), Narayan Das (Delhi Dynamos);

Midfielders: Udanta Singh (Bengaluru), Rowllin Borges (NorthEast United), Anirudh Thapa (Chennaiyin), Vinit Rai (Delhi Dynamos), Halicharan Narzary (Kerala Blasters), Ashique Kuruniyan (Pune City), Germanpreet Singh (Chennaiyin), Jackichand Singh (Goa), Pronay Halder (ATK).

Forwards: Sunil Chhetri (Bengaluru), Jeje Lalpekhlua (Chennaiyin), Sumeet Passi (Jamshedpur), Balwant Singh (ATK).